Timpuunon ‘gaji minimum’ kopoingkawas do konuonuan pakaraja - Riot

KOTA KINABALU: Kapamanaan timpuunon gaji ogumu (dasar gaji minimum) ih pinogirotkuasa di ontok 1 Julai nakatalib, kaanu nogi popoingkawas do ‘ekonomi’ pogun montok momodimpot korikohonon pogun koburu kipandapatan takawas.

Montiri Kotos Tulun Datuk Seri Richard Riot minoboros do timpuunon gaji ogumu ih pinapanau maya do koinsomokan haro kaadangon id pialatan touki om pakaraja dino nokomoi nogi kopongingkudi do kapalalansanan Malaysia nokomoi pakaraja songkosuaian.

“Ilo (dasar gaji minimum) nogi kaanu mongingkudi do rontob komosikinan pogun Sabah ih abino diti kiginumu apat paratus,” ka dau idsuang teks pason dau kopinamot pinonimpuunan ‘Program Kembara Kerjaya Sabah’, ‘ Konvoi Kembara’ om ‘Karnival Pekerjaan 2016’ hiti konihab.

Teks pason dau binasa di Luguan Monunurat Komontirian Kotos Tulun Datuk Seri Adenan Ab Rahman. Nokotindapou nogi id ramai dilo nga ih Montiri Kotundaan Rayat om Ahal Momoguno Sabah Datuk Jainab Ahmad Ayid om Potunud Koupisan Winakas Karaja Sabah Kamal Pardi.

Tumanud Riot do au nodi muhang Malaysia lumansan doid balanja kuli di osuriba montok monokialit id dagang ‘global’ sabap Malaysia au nodi kamampu om haro kolobian monokialit nung piagalon miampai pogun doros ih kiharo kuli di togumu om omuura.

Ka dau maya kopoingkawasan ‘gaji minimum’ diti, winakas karaja kinoiyonon kaanu asil tosonong sabap kapamanaan ‘gaji minimum’ kopoingkawas do balanja pamaganuan winakas karaja songkosuaian sabap sansagan touki mambarai ‘levi’ om ‘caj’ suai, om kaanu nogi mongukab kosiwatan pakaraja kumaa pakaraja kinoiyonon.

Moboros kumaa do monunurat abar kalapas dilo, noboros di Adenan do kapamanaan ‘dasar gaji minimum’ dino nokomoi notorimo nodi toinsanan tinan sabap pogului kinapanamaan dilo pogibabarasan aralom kopio kopohompit do pakarajaan, touki om pakaraja nakaharo noh.

Ka dau, nonuan nogi timpu togumu o toinsanan tinan montok monimbang do toinsanan ahal komoi do ralan tonudon dilo om pogului porinta pinapatatap do rontob ‘gaji minimum’.

“Kopogirotankuasa wonsoyon do Koupisan Winakas Karaja (JTK) Sabah. JTK maganu laang di kangaam kopio montok papatantu do ralan tonudon dino nokomoi tonudon do touki,” ka dau.