Ingaton woniton pomusarahan
# Kopoingatan di Salleh kumaa rayat sabap haro tinan ataian do kamampuan porinta popoburu pogun
KINABATANGAN:Pinosorou di Montiri Komunikasi om Multimedia Datuk Seri Dr Salleh Said Keruak o rayat mooi do miingat-ingat miampai laang tinan pointantu ih kuminam mangawanit pomusarahan diolo montok araatan/ otukanaan porinta.
Tumanud disio tinan pointantu id labus pogun dilo maganu laang irad dilo sabap ataian/mosolon miampai porinta ih kaanu popoburu do pogun id koyuon ‘demokrasi’ om nogi koponoluod doid kotoonongan.
“Yolo (tinan pointantu id labus pogun) mogipaapakat miampai tinimungan tokoodo id Malaysia mangawanit do pomusarahan rayat kaamung momonsoi panandasan di pagarawatan om paparaat kumaa Luguan Montiri.
“Ilo kitujuan mooi rayat atagakan kotumbayanan kumaa Luguan Montiri ih pinili rayat maya kopoindalanan ‘demokrasi’,” ka dau ontok minanahak boboroson id Abaabayan Walai Poingukab Aidilfitri Puru Lamin Koundangan Pogun Sukau Datuk Saddi Abdul Rahman hiti, konihab.
Salleh ih nogi Bendahari UMNO minoboros do yolo momoguno do ‘media sosial’ miampai gambar taraat montok mangawanit do pomusarahan rayat tuh araatan do porinta.
Minanahak isio suntu iso ‘portal nedia’ ino nopo nga Sarawak Report ih kinuasa di tulun koonobon, Clare Brown miupakat miampai tulun id pogun diti kitujuan mangawanit do pomusarahan rayat montok araatan di Luguan Montiri.
“Momonsoi yolo do mogisusuai panandasan maya do ‘media sosial’ ih kopotopotan dilo kopotongob. Ahal tagayo diolo nga tuh porinta tumanud tutuduk om kopokionuon diolo,” ka disio.
Idsuang ahal dilo, noboros di Salleh do Tinan Monorina Komunikasi om Multimedia minaganu laang minangantob Sarawak Report katapi tuminilombus yolo minomoguno do laang suai kaamung noh Facebook om Twitter montok paparayat do kapangaratian pomusarahan diolo.
Ka disio laang diolo dilo au kopitunud miampai kararalanon ‘demokrasi’ ih ubasanan id pogun diti miampai rayat minomili pomorinta minaya do pomilian tagayo pogun.
Minoboros isio do sabaagi rayat Malaysia, nopo nga kiguno kopio montok mongunsikou miampai rati kinalantaian di minog do potilombuson om gompion mantad kosoon di tinan di ataian do kotoonongan om pisaan rayat id pogun diti.
“Tokou rayat Malaysia ih papatantu do timpu tabantalan om parti nonggo ih momorinta,” ka disio.
Tumanud disio kuasa labus dilo muhang momonsoi ponimbanan pomorinta pogun miampai mangasou paparatu miampai duo ralan ino nopo nga miampai popilongot do kararalanon pulitik pogun om mangawanit do pomusarahan rayat.
“Aiso yolo id pogun diti katapi momoguno do ‘media sosial’ montok mangawanit do pomusarahan rayat,” ka disio.
Minoboros isio do tinan dino nokomoi au magandad pomilian tagayo sabap koilo yolo do aala om iti otopot kopio minaya do kinamanangan tagayo Barisan Nasional id pomilian tagayo id Sarawak om duo Pomilian Tokoodo id Selangor om Perak.
Minoboros ih Salleh do koporintaan Malaysia id siriba buruanan Datuk Seri Mohd Najib Tun Razak minggisom tumopot kopio papanau do abaabayan montok rayat kaamung noh kosiwatan ‘ekonomi’ om pakarajaan sundung pia haro ponginaman tinan pointantu muhang paparatu pomorintaan disio miampai laang au momoguno ‘demokrasi’.