‘Program Kembara Kerjaya Sabah’ posodia 8,809 kosiwatan pakarajaan
KOTA KINABALU: ‘Program Kembara Kerjaya Sabah’ om Pengajian OKU 2016’ ih tuminimpuun konihab poposodia do 8,809 kosiwatan pakarajaan idsuang mogisusuai pomorunan montok rayat Sabah, ka di Montiri Kotos Tulun, Datuk Richard Riot.
Ka dau abaabayan ih tumongkop turu watas id pointongkop Sabah ih tuminimpuun id Kota Kinabalu om opupusan do ontok 6 Ogos tabantalan id watas Beaufort dilo nomungan di 195 touki om 34 mintamong mantad pomorunan misosondiri.
“Abaabayan diti nopo nga laang pisokodungan mogisusuai agensi koporintaan pisompuruan, koporintaan Pogun Sabah om touki. Ralan tonudon misokodung pialatan koupisan nopo nga id pialatan kopoinsomokan ‘Strategi Lautan Biru Kebangsaan’ (NBOS) ih pinointutun di luguan montiri,” ka disio.
Noboros disio ahal dilo id teks pason dau kopinamot pinonimpuunan ‘Program Kembara Kerjaya Sabah’, ‘Konvoi Kembara’ om ‘Karnival Pekerjaan 2016’ hiti konihab. Teks pason disio binasa di Luguan Monunurat Komontirian Kotos Tulun, Datuk Seri Adenan Ab Rahman.
Nokotindapou nogi ih Montiri Kotundaan Rayat om Ahal Momoguno Sabah, Datuk Jainab Ahmad Ayid om Potunud Koupisan Winakas Karaja Sabah, Kamal Pardi.
Tumanud Riot, abaabayan iso’i ih pinaharo di toun nakatalib id Sabah nakaanu pinopoiyon do kiginumu 2,581 mogihum karaja ngawi diti. Iti aanu mongintong maya pisokodungan pialatan JTK Sabah om Koupisan Kotorinaan Kotundunan Am Sabah minanganjur do Tadau Panggajian OKU diti (kopinamot abaabayan diti),” ka dau.
Minoboros ih Riot do maya pisokodungan miagal diti, ino kaanu popoingkawas do kopurimanan id pialatan tulun ngawi kokomoi do panggajian OKU, doulu noh id Sabah.
“Abaabayan diti nogi kaanu mongunsub do koporijistaran om pongiyanan mogihum karaja id pialatan OKU om nogi kopongunsub do touki poposodia do kosiwatan ngawi pakarajaan kumaa tinimungan diti,” ka dau.