1,300 kitoruol lulusou tawak pokiubatan hemodialisis id Sabah
KOTA KINABALU: Piaga-aga do kiikira 1,300 kiturol lulusou tawak id pogun diti momoguno do pongubatan hemodialisis, om 200 kagu kakaal id nuludan magandad giliran pokiubatan.
Potunud Hospital Tondu Tangaanak Sabah (HWKKS) Tan Bee Hwai minoboros do Unit Hemodialisis lamin pongusapan dilo nogi baino diti bulun noh kaanu momogonop 110 gisom 120 tulun sumakit do potitikid timpu.
“Miampai ginumu pakakaraja ih posodia haro id lamin pongusapan diti, nakapanau tokou noh do karaja induo kogumu ilo nopo nga poposodia do pongubatan hemodialisis kumaa kiginumu 110 gisom 200 tulun potitikid tadau.
“Iti kapanahak do kawagatan tagayo kumaa klinik swasta ih suai montok mongubat do tulun sumakit om haro somoonu diolo di apatut pokiubatan hemodialisis otoliban,” ka dau id Abaabayan Lamin Poingukab Hari Raya Aidilfitri pinanjur songowian Unit Hemodialisis HWKKS om Yayasan Nur Jauhar, hiti konihab.
Minoboros isio do pinggisoman porinta montok popoingkawas do kopurimanan kokomoi kapadtamangan kolidasan nopo nga iso laang opurokis ( efisien) montok mongingkudi do ginumu kitoruol lulusou tawak.
Ka dau kontodonon tagayo karaagon lulusou tawak nopo nga sabap do kapamaganuan tubat di alaid kopio montok tulun sumakit ih nokotoguang do kobolingkangan kolidasan miagal ‘diabetes’ om kosotolan raha akawas.
Kokomoi pongubatan ‘ kanser’ nopo, noboros di Tan do soosomok 7,200 kitoruol kanser id pogun diti masaon pokiubatan id Longkod Kanser Borneo ih pinoturidong mantad 2013 poh.
Ka dau ginumu dilo au kopohompit do tulun sumakit mantad bogian kosilahon, bogian labus kakadaian om nogi piipiro watas pointantu ih mokiubat miagal ih pinosodia id longkod dilo.
“Gisom baino diti, haro noh duo mesin radioterapi tokou hinonggo ‘piawaian’ om ‘ standard’ mesin diti kotopong miampai mesin ih gunoon id labus pogun,” ka dau.
Suai ko ilo ka dau, HWKKS nogi baino diti monorina do kiginumu 15 gisom 16 noribu ginumu kohodion baragang idsuang timpu sontoun toiko 50 gisom 60 kohodion potitikid tadau.
Mantad dilo ka dau, koyuon dilo kopokito do bogian kolidasan dino nokomoi atangkangau kopio om koponolon balanja tagayo montok kotundunan rayat.
Pogului, nakaharo nogi id abaabayan dilo nga kapanahakan toluod turu tirikohon ruda ino nopo nga limo kumaa kitoruol om lobi dino montok kogunoon Unit Hemodialisis om toluod suai.
Toluod dino nopo nga asil pinisokodungan pialatan Yayasan Nur Jauhar songowian Koupisan Kastam Diraja Malaysia Sabah. Kinapanahakan dilo pinababai di Mononontuduk Yayasan Nur Jauhar Toh Puan Norlidah RM Jasni.
Nokotindapou nogi id ramai dilo nga ih Ponorikohon Yayasan Nur Jauhar Al Hamra Tun Juhar, Naib Canselor Universiti Malaysia Sabah ( UMS) Datuk Mohd Harun Abdullah, Kotinanan Potunud Yayasan Nur Jauhar ih nogi Reaktor UiTM Sabah Datuk Abdul Kadir Rosline, om Ponulung Wanan Potunud Kastam Diraja Malaysia Sabah Julaiman Soimin.