Farmasi Pandu Lalu posodiaon id UTC Kota Kinabalu: Jimmy Kosiwatan pakarajaan id Karnival Kerjaya TVET Sabah 5-6 Sept.
KOTA KINABALU: Kotorinaan Farmasi Pandu Lalu ih torinaon do Koupisan Farmasi Pogun mangan posodiao id Longkod Ponimbanan Kakadaian (UTC) Kota Kinabalu au noh alaid.
Luguan Koupisan ( Ponorinaan) UTC, Jimmy Berukang minoboros do UTC Kota Kinabalu baino maamaso momonsoi pongumbasian nokomoi kotorinaan id longkod dilo montok poposodia do tubat ngawi (farmasi) dilo.
“Kogunoon do Farmasi Pandu Lalu dilo montok iyonon pamaganuan tubat sumusuut noopo. Rati dilo mumbaya noopo tombului ngawi om tumilombus maganu tubat miampai au minog magandad alaid,” ka dau.
Minoboros isio do kounalan dilo mangan wonsoyo poingoros miampai Klinik 1Malaysia ih posodia papanau kotorinaan id UTC dilo.
Tumanud Jimmy kotorinaan dilo nopo nga toiso-iso ih kawawagu di aiso poh doti id UTC suai id pogun diti montok papasanang om kapanau tososonong karaja kapamaganuan tubat di tombului ngawi.
Namot dilo, minoboros isio do mantad podi UTC Kota Kinabalu pinapanau kotorinaan di ontok 16 Disember 2013, nokoponorimo noh longkod dilo kiginumu 2,167,812 tombului montok kapaganu do mogisusuai kotorinaan.
Minoboros ih Jimmy do ginumu tombului korikot nopo nga mogisusuai tumanud timpu nga ‘purata’ dilo pialatan 2,000 gisom 3,000 tombului sangadau.
“Ginumu tombului korikot tumanud timpu nogi. Suntu dilo ontok timpu koundorongan (cuti) sikul tombului atambaan gisom 3,000 lobi om soira timpu BR1M (Sakadai Rayat 1Malaysia) obuli korikot kiginumu 5,000 tulun sangadau,” ka dau.
Minoboros isio do UTC ih papanau kotorinaan mantad jam 8 kosuabon gisom 9 dongotuong dilo nakaanu pangaramitan kopongunsub kopio mantad tulun togumu gisom ontok timpu koowion minggu nga tulun togumu tatap korikot montok kapaganu do kotorinaan.
UTC, ih manahak do kotorinaan id siriba abaabayan ‘Strategi Lautan Biru Kebangsaan’ ( NBOS) dilo poposodia do mogisusuai kotorinaan idsuang iso linominon ih pinosodia di mogisusuai koupisan, agensi koporintaan pogun om pisompuruan, swasta, koisaan okon porinta (NGO) om perbankan.
Pialatan dilo nga Koupisan Koporijistaran Pogun ( JPN), Koupisan Imigresen, Klinik 1Malaysia, Pos Malaysia, Koupisan Waig Pogun Sabah, Dewan Bandaraya Kota Kinabalu (DBKK) om Kotinanan Asil Suang Pogun (LHDN) om nogi nogonopan surau om kafeteria. -Bernama KOTA KINABALU: Politeknik Kota Kinabalu osiliu tiyonon monompuan ‘ Karnival Kerjaya TVET Sabah 2016 ontok 5-6 September tabantalan.
Abaabayan diti nopo nga onjuron songowian Institusi TVET Sabah (Politeknik, Kolej Kmiampai pitambaan Koridor Kotundaan Sabah om Koupisan Winakas Karaja Pogun Sabah (JTK).
Abaabayan kopotimpuunan karnival pinanjur montok kumoinduo diti potimpuunon di Kumoduo Montiri Balajaran Takawas Datuk Mary Yap Kain Ching id Dewan Rafflesia, Politeknik Kota Kinabalu ontok 6 September.
Potunud Politeknik Kota Kinabalu Roslee Yahya minoboros do kapanganjuran karnival duo tadau dilo kopohompit do kiginumu 18 tinan/ponginabasan takawas kaampai mantad Politeknik, Kolej Komuniti om Kolej Vokasional Sabah ih ponogi tinan balajaran om pingludaan teknikal om vokasional (TVET).
“Karnival diti tantu do osiliu ‘paltform’ om ‘mediam’ tosonong kopio kumaa susumikul ngawi om nakatamat ponginabasan takawas TVET montok kapaganu do kopoilaan kikoompitan kogunoon pomorunan om kopointalangan kinoiyonon pakarajaan montok ih kakaal poh aiso pakarajaan.
“Lobi 170 kosiwatan pakarajaan posodiaon di 10 agensi mogisusuai pomorunan id karnival baino diti, om susumikul ngawi doulu noh nakatamat ponginabasan takawas TVET om pialatan sukod tomulok ih kakaal mogium pakarajaan pokionuon montok tumindapou ‘ temuduga’ poingukab ih posodiaon tumimpuun jam 8 kosuabon gisom 5 sosodopon.
“Kumaa di orohian tumindapou timpu ‘temuduga’, kogunoon miagal ‘biodata’ tinan sondiri om kinapaasan ‘akademik’ mositi owiton nogi,” ka dau.
Suai ko ilo, kawagu dau, Karnival Kerjaya baino diti nogi kopokito do mogisusuai pomiran mantad 30 tinan balajaran taakawas om pomorunan, suai ko timpu manahak boboroson (ceramah) om ‘forum’ pakarajaan mantad lansanon pomorunan di nalap montok papatarang do susumikul ngawi om tulun nokotindapou kokomoi ‘senario’ pakaraajaan timpu diti.
Minoboros Roslee do Kumoduo Boyoon Montiri ih nogi Montiri Kotundaan Pomorunan Datuk Seri Panglima Raymond Tan Shu Kiah tumindapou nogi doti montok miapu toilalaan om tuwa pomusarahan disio id timpu manahak boboroson (ceramah) om ‘forum’ pakarajaan ontok 6 September tiinu.
“Alansan kopio susumikul ngawi om tulun togumu, doulu noh graduan ngawi au papatalib do kosiwatan diti montok songowian ngawi mokinongou timpu pikunsian disio (Raymond) ontok timpu dilo,” ka dau.
Montok kopoilaan potilombus kokomoi do karnival om timpu ‘temuduga’, obuli rumomut osondikot miampai Urusetia Karnival Kerjaya TVET Sabah 2016, Noraina Abdul Rahman toiko Sierah Ginsos.