JKJR Sabah maganu do ruputan tosoriuk # Sumusuhut limo noduso id kinoligaganan id Lahad Datu
KOTA KINABALU: Koupisan Koumoligan Talun Alun (JKJR) Sabah kapaganu doti ruputan mantad Pulis Diraja Malaysia (PDRM) id Longkod Upis Lahad Datu kokomoi kopointarangan tosorisid kinoligaganan noduso ih pinopohompit do limo kinapataion id Ralan Tungku, poingoros Kabun Bagahak Lahad Datu, hiti di Minggu nakatalib.
Potunud JKJR Sabah Herdiansah Abdul Karim minoboros do sumusuhut kinantakan dilo, mokianu nogi bogian dau do ruputan mantad Longkod Pomorisaan Padsakaian Kikomputer (Puspakom) raan Lahad Datu.
“Ruputan di aanu diti pikunsian miampai tososonong miampai bogian Institut Ponoriukan Koumoligan Talun Alun Malaysia (MIROS) montok papasanang do tinan di kohompit momonsoi do ‘Road Crash Reconstruction’ montok papaharo do iso ‘senario’ osomok kopio miampai kinantakan dilo suai mantad kapaganu do natadon totootopot ih kinontodonon do nantakan o kinoligaganan dilo.
“Papaharo tokou nogi do kakapan doid tampat kinantakan montok kapaganu do kopokitonan tosoriuk idsuang timpu tosomok diti montok mongintong do nokoponoluod nogi nangku koyuon talun alun dino do nantakan o kinoligaganan dilo,” ka dau ontok romuto hiti konihab.
Id kinoligaganan dilo, limo sampaganakan noduso kaamung tolu tangaanak, om songulun kagu noindamaan nosindualan. Kinoligaganan kopohompit do pinilanggaran pialatan korita Proton Saga FLX om 4WD kawo Toyota Prado id Kilometer 41, Kabun Bagahak, Ralan Tunku Lahad Datu.
Munggui ih noduso nointutunan Mazlan Muhamad Usof, 33, Nurijah Bkorah, 32, Muhammad Eznur Shahziman Mazlan, 6, Nurul Suerah Mazlan,4, om baragang tondu kiumur sontoun, om Nurul Zuelah Mazlan,7, pinoruput do nosindualan.
Minoboros Herdiansah do pinaamung do bogian dau o kinoligaganan dilo sabaagi koligaganan ‘berprofil’ akawas sabap do ino kopohompit do tolu kinapataion montok isoiso kes koligaganan talun alun.
Ka dau JKJR Sabah au kaanu mongomi lobi potilombus kokomoi do kinantakan dilo sabap do ilo kakaal id suang ponoriukan timpuunon PDRM.
Poingkuro poh nga ka dau, momoguno talun alun id ralan Lahad Datu-Tungku ih noilaan sabaagi tampat asaru antakan koligaganan talun alun pinosorou tuh toririmo maganu laang ‘defensif’ ontok papanau padsakaian id bogian dilo.
“Pialatan ‘defensif’ di obuli gunoon mamakai montok mongingkudi do kaantakan koligaganan nopo nga mamalan pindalanan miampai tososonong, papatantu do papapanau mongilo do koyuon posorili di toguangon om tumanud do kooturan talun alun miampai timpu kosiahon di pinatatu.
“Suai ko ilo, papapanau mositi do au popolombus do pindalanan sokiro ko tiodopon toiko koyuon tawan di au osonong miagal asapou rasam...sokiro ko kotoguang koyuon irad dilo, potontuon padsakaian kiharo id koyuon di oumolig,” ka dau.
Tumanud do ‘statistik’, kiginumu 80.6 paratus koligaganan talun alun kinontodonon mantad kolowongon momoguno talun alun sondiri, 13.2 paratus sabap do koyuon talun alun om 6.2 paratus sabap do mantad au kaanu manamong padsakaian miampai tososonong.