Mongingia tondu nosinduahan sabap tinobok
SANDAKAN: Songuhun mongingia tondu nakakandai nosinduahan id boogizan hizou sabap tinobok di songuhun kusai do naamot pinopundoong kulita dau poindoos iso restoran id Batu 4, di sosodopon tadau Kaapat nakatahib.
Huguan Pulis Uvang Asisten Komisioner Zabidi Md Zain minoboos do munggui kiumul 27 toun nakakandai nosinduahan id boogizan hizou sabap tinobom miampai minomoguno do iso pisau pomutu tuva.
“Kiikila jam 7.20 dongotuvong, puu pulis ih pakalaja id Balai Polis Sandakan nokotoimo pamahaavan mantad Hospital Duchess Of Kent Sandakan kokomoi do kes dino nokomoi,” ka disido.
Minoboos isido asil pinonoizukan timpuuni nokoiho do ontok kinantakan kiikila jam 6.20 sosodopon, masaon munggui popundoong kulita dau id tampat pundoongan kulita poindoos iso restoran, id Batu 4, Sandakan montokmomohi taakanon.
“Suspek nokoikot mantad ponong douvi poingkakat id tisan tongobon tiguhu kulita munggui om minonuu munggui mamanau doid tampat tiikon ponong papanau,” ka disido.
Minoboos Zabidi do minomogizak munggui mokianu ponuhungan kahapas dino suspek minaganu haang miampai minonobok munggui minomoguno do pisau pomutu tuva om kahapas dino minogidu.
“Mungui kahapas dino pinapanau kulita dau pinougadan doid ponong restoran dino nokomoi montok mokianu ponuhungan katapi au pinoduhi,” ka disido.
Minoboos isido munggui minuhi doid daamin om minomisunud tambahut ih poingizon iso hamin poguhui songuhun mantad tambahut dau pinapaatod disido doid hamin pongusapan montok pokiubatan potihombus.
“Masaon do pulis mogium songuhun kusai kihinangkou kiikila 5 kaki, kiumul binduugan 20- an montok monuhung ponoizukan,” ka disido.
Minomisunud Zabidi do boogizan pulis kakaal monoizuk kinantakan dino tumanud Seksyen 324 Kanun koundosoan.
“Pokionuon do pulis o tuhun togumu ih kivaa kopoihaan toi nokokito kinantakan dino tu tumuubung upisol monoizuk Inspektor Jasmera id numbul 089-221251 Balai Polis Sandakan montok monuhung ponoizukan,” ka disido.