‘Sindiket’ poinggagayo nakakung JKDM Sabah minamagahau 32 kontena barangan tolosok kigatang RM1.5 riong
KOTA KINABALU: Koupisan Kastam Diraja Malaysia ( JKDM) Sabah pinapakakung do tinimungan papanau kaparagatan ( sindiket) poinggagayo minogowit suminuang miampai aiso kasagaan mogisusuai barangan ih pinosuang idsuang 32 kontena ih piaga-aga kigatang RM1.5 riong miampai ‘duti cukai’ RM4.5 riong id Lolokiton Sepanggar, hiti di wulan nakatalib.
Kumoduo Luguan Potunud Kastam (Popogirotkuasa om Kapatanudan) Datuk Subromaniam Tholasy minoboros do bogian dau nakaanu pinapanau do kapamagakaman dilo maya kinapamanaan ‘ Penyelarasan Pengurusan Sempadan’ (CBM) mantad di toinsanan bogian koupisan kastam miampai pinisokodungan bogian lolokiton om agensi popogirotkuasa suai.
“Idsuang timpu tolu minggu kinapamanaan operasi CBM, nakaanu tokou pinapakakung do kaparagatan minogowit suminuang barangan aiso kasagaan poinggagayo om minamagahau 32 kontena ih pinoposuang do mogisusuai barangan tolosok ih nowit suminuang id pogun diti.
“Pialatan ih nagamu kaamung noh 21 kontena kisuang kiikira 249,372 liter tiinumon tokodou mogisusuai jenama kaamung noh Tiger, Breweiser, Apple Cider, Tsi Tao, Hollandia om Lander Brew Oxsburg.
“Asil pinonoriukan nogi nokoilo do koinsanai tiinumon tokodou piaga- aga kigatang RM870,000 miampai ‘duti cukai’ kiginumu RM3.69 riong.
“Koinsanai tiinumon tokodou dilo kikotumbayaan nowit suminuang mantad Singapura om Vietnam montok potikidon id kapadagangan kinoiyonon poingkuro poh nga, koinsanai barangan dilo pinataru sabaagi perabot om pakakas lamin,” ka dau id pitimbungakan abar id Longkod Upis Kastam Sabah, hiti konihab.
Nokotindapou nogi id pitimbungakan abar dilo nga ih Potunud JKDM Sabah Datuk Dr. Janathan Kandok, Potunud Kastam Raan Ponoinuan Mohd Yusof Ismail om Kumoduo Potunud Kastam Pogun Bogian Popogirotkuasa Yunos Tahir.
Minoboros ih Subromaniam do id ‘operasi’ misusuai nakapamagahau nogi bogian do walu kontena ih pinoporumpos do 170,150 kilogram wagas mantad Thailand miampai kopohompit gatang kiginumu RM380,000 om ‘ duti cukai’ kiginumu RM680,000.
“Nokoporikud nogi operasi dilo do pinamahauan kiginumu 2,131 unit tayar mantad China ih pinosuang id tolu kontena kigatang RM300,000 om kopohompit duti cukai kiginumu RM150,000.
“Koinsanai tayar dilo pinataru sabaagi tayar totootopot, poingkuro poh nga maya pinonoriukan potilombus nokoilo do bogian pangalabus bulun noh minoboros do saiz tayar tagayo om minaganu laang miampai pinopolisok tayar kitukuan tokoodo idsuang dilo montok tujuan momilut,” ka dau.
Ka dau, bogian dau baino diti nokoilo noh bogian ih minomonsoi kapataruan au otopot ( palsu) nokomoi barangan ih momoguno do lisin ‘import’ om maganu laang potilombus kalapas ponoriukan potilombus pinapanau.
Tumanud dau, kes diti soriukon tumanud Seksyen 135 ( 1) ( a) Akta Kastam 1967 miampai danda au okurang mantad 10 om au kolobi mantad 40 kogumuo mantad gatang barang toiko ukuman jiil toiko goduo-duo dilo.
Idsuang ahal dilo, pokionuon nogi di Subromaniam o tulun togumu ih haro nunu noopo kopoilaan kokomoi tinan ih popoopi, kiharo om mogowit barang di aiso kasagaan kastam tuh sumikap poporuput doid kastam maya numbur 1- 800- 888855.
Namot dilo, minoboros ih Subromaniam do kinalantayan id operasi dilo tumanud do ‘konsep’ CBM maya ‘idea’ kinapamanaan b’Organisasi Kastam Sedua’ ( WCO) ih pinapawakas do kararalanon kapadtamangan piwolitan pogun miampai pinisokodungan agensi kapadtamangan piwolitan suai.
“Katanud miampai ‘ konsep’ Strategi Lautan Biru Kastam ( CBOS), JKDM monginsonong kapamanaan CBM miampai papaharo do iso tinimungan poimbida CBM ih kaampai mantad piromutan upisor tabaal om kitoilalaan mantad bogian Popogirotkuasa , Perkastaman om Kotorinaan Teknik.
“Mundaliu tokou doid kopongintangan kopoindalanan mantad kopongintaangan ‘produk’ om papanau do ‘sistem dimerit’ om iduon tokou lisin kisala osondikot nung noilaan minomonsoi do kasalaan popilasu ‘dokumen’,” ka dau.