Ingat-ingaton miampai laang ngawi ‘agas-agas politik’ - Salleh
KOTA BELUD: Pinosorou di Bendahari UMNO Datuk Seri Dr Salleh Said Keruak o puru Umno tuh toririmo miingat-ingat nokomoi laang ngawi piipiro tulun ih komoyon dau sabaagi ‘agas-agas politik’ ih kuminam momiraag do parti miampai popimboros do mogisusuai ahal.
Montiri Komunikasi om Multimedia dilo minoboros do piipiro ‘agas-agas politik’ ih gulu poh songowian ngawi id padamaan Umno, katapi baino nakawaliu ralan ( berpatah arang), miniupakat miampai pambangkang miampai monugi do mogisusuai tiwou di nolobi-lobi (sentimen) sababaa montok kapaganu kosianan tulun togumu tuh kotilombus kapaganu pongintangan.
“Mositi tumungag tokou om sumaap tulun ngawi diti, ih suminiliu ‘dalang’ om ‘petualang’, momiraag do parti Umno, om kuminam ngawi popotorob do kapal tayao (bahtera) Umno miampai mimboros do surita ngawi miagal 1MDB om ‘derma’, DOJ om susuap, om ogumu poh kagu ponombirangan pulitik ih umbalan do momusing.
“Tulun ngawi di nakawaliu noh ralan diti, ih minghombo mogowit ginawo di nompuong, okon ko mindaama sandad toiko totootopot, katapi , miagal tombolog kondiu ih tumulud mongintai kosiwatan noopo, soira kaanu om owiton nogi muli, katapi soira au kaanu, om isio nga tumulud tumagak,” ka disio ontok minanahak boboroson id Miting Lalansanon Umno Bogian Kota Belud hiti konihab.
Salleh ih nogi Kumoduo Luguan Piturubungan Umno Sabah nogi monngomi do tinimungan diti sabaagi ‘ulanut nalanan kulit’ sabap pomusarahan dau nalanan 90 darjah kalapas nopo ‘nalanan kulit’ ih kasanggup momonsoi nunu noopo montok paparatu do porinta miampai au ‘demokratik’.
“Nung gulu poh au insan mimboros popindaama do ‘hak’ Sabah, katapi baino tigog do kuminam sumiliu ‘ hero’. Nung gulu poh poingkadaada nopo, katapi baino atangkangau minghombo doid pointongkop pogun. Nung gulu poh mingkawas yolo gumaga do momuruan, katapi baino momogiak ‘ slogan’ mongolon momuruan om porinta ih pinili,” ka disio.
Tumanud Salleh, montok mongolon toisoiso porinta, ino au obuli wonsoyon miampai kouhangan ginawo sondiri noopo miagal ‘prinsip’ mongolon rasuk sabap pogun diti momoguno do ‘sistem demokrasi’ kiparlimen, undang-undang om kooturan, sistem koundangan om kohakiman di mositi sokodungon om pantangon poimponu mantad rayat.
Poingkuro poh nga ka disio tinimungan ‘agasagas politik’ ih au nokosigampot iman-imanon dilo baino minggisom paparatu do porinta miampai papagambar do Umno om Barisan Nasional (BN) sabaagi parti di au obuli silihon do sondihon sundung pia UMNO om BN noh ih papataru diolo id korikohonon baino diti.
Tumanud dau, au noh oindamaan kopio montok mongomi do tinimungan dilo sabaagi ‘sudah lupa daratan’ om nolorihan toruol ‘alzheimer politik’ hinonggo olihuwan diolo o karaja tosonong Umno ih minanahak koposion diolo solinaid diti.
Kokomoi miting tounan Umno dilo, Salleh ih nogi Luguan Umno Bogian Kota Belud minoboros do ilo mositi do silihon sabaagi ‘platform’ montok papatarang do ahal ngawi insan timpu kumaa puru parti id bogian gamut sakot montok popomilo diolo karati do ahal dino nokomoi tuh au asanang ompuong miampai nunu noopo panandasan do pambangkang.
Pinosorou nogi di Salleh o puru Umno tuh momoguno do ‘media sosial’ miampai opurokis om au tutumanud om oimbayatan miampai koulalahon tinan pointantu kasala momoguno do kosimbayanan momoguno do kakamot pironitan dilo montok paparayat ahal di au osonong om paparaat om popoikum- ikum do tulun suai kaamung momuruan.
“Idsuang ahal diti, alansan kopio oku rayat doulu noh puru Umno apandai mamagatang om manapis kopoilaan di au osongkuro koontok toiko au otopot, kopoilaan pilasu, ponombirangan, pongimbarasan om paparaat ih parayon di tinan pointantu maya media sosial. Kada tokou kopio kasala momoguno ‘media sosial’. Suntu Sarawak report,” ka dau.
Nulit nogi disio tumaru Umno Kota Belud montok mingkakat gumirot id tohuri kopomuruanan Presiden Umno om Luguan Montiri, Datuk Seri Najib Tun Razak om Boyoon Montiri ih nogi Ponorikohon Tinan Piturubungan Umno Sabah, Datuk Seri Musa Aman om tumoguang do nunu noopo ponokialitan, osonong mantad suang toiko labus parti montok agama, bansa om pogun. - Bernama