Gerakan Sabah mokitamba duo tirikohon DUN om iso Parlimen
KOTA KINABALU: Parti Gerakan Sabah mokianu panambaan sokurang-kurang duo tirikohon Lamin Koundangan Pogun (DUN) om iso Parlimen.
Ponorikohon Piturubungan Gerakan Sabah Datuk Gordon Leong minoboros, Gerakan Sabah haro rikod tosonong atus paratus id Pomilian Tagayo ko-13 (PRU-13) hinonggo nakaanu minamalantoi goduo-duo tirikohon di pinisaap.
“Mantad dilo, nopo nga au oindamaan kopio montok tokou mokianu duo kagu tirikohon pomoruhangan montok pisaapon id PRU-14 tiinu.
“Suai ko ilo, pokionuon ku nogi tu Presiden Gerakan kaanu monimbang tuh popindaama do iso tirikohon Parlimen montok Gerakan Sabah,” ka dau ontok minanahak do boboroson dau id pitimungan Tounan Lalansanon Gerakan Sabah ko-20 hiti konihab.
Minoboros isio, Gerakan sabah haro momuruan di opurokis momusorou, kikobulihan, otorimo togumu, aparu kumaraja om kakaal omulok montok silihon do calon ontok PRU14.
Ka dau, yolo toririmo kumaraja montok parti om tulun ngawi om nogi haro ‘imej’ di tosomong id pialatan momuruan Pikoruhangan Barisan Nasional (BN) om komuniti.
Ontok dilo, mokianu nogi Gordon doid koporintaan Longkod monuridong do iso lolokiton susumangod daat poinlongkod id Sandakan toiko Tawau.
“Ilo montok tujuan pomoruhangan kapadtamangan koumoligan piwolitan Malaysia miampai pogun doros. Sandakan baino haro iso lolokiton susumangod di tokoodo katapi osonong kopio montok poinggoyoon silihon iso lolokiton di lobi tagayo.
“Miampai laang irad dilo, tantu noh do koumoligan kinoiyonon kaanu papagaras. Tulun taraat ( lanun), mananazang, bot songkosuaian miampai tukuan monginsada nangku toiko sumuang doid Malaysia miampai aiso kasagaan kaanu manamong miampai tososonong,” ka dau.
Nokotindapou nogi id ramai dilo nga Kumoduo Presiden Gerakan ih nogi Kumoduo Boyoon Montiri Datuk Seri Panglima Raymond Tan Shu Kiah om momuruan Gerakan Sabah ih suai.