Koinsanai kobolingkangan rayat pogonuan laang ponugutan montok panalasaian - Pairin
TAMBUNAN: Kumoduo Boyoon Montiri Tan Sri Joseph Pairin Kitingan manahak jominan toinsanan kobolingkangan di pinoimbulai toiko pinosuul do rayat hiti pogonuan pongintangan om laang ponugutan.
“Kobolingkangan koponugkuan miampai aiso kasagaan tana, ralan nopiang om koponimungan waig maya abaabayan diti pogonuan laang ponugutan,” ka dau kumaa Utusan Borneo kalapas Abaabayan Tadau Miruba Tombului ih pinaharo id Pisompuruan Square, hiti di tadau Kaapat nakatalib.
Id abaabayan dilo, kiginumu 42 kaunter nukaban di Koupisan ngawi Koporintaan Pogun om Pisompuruan om kiginumu 52 tombului nokotindapou pinoposuul do kobolingkangan di notoguang.
Ka dau, koponugkuan tana miampai aiso kasagaan, kobpiangan tana om kinaraagan koponimungan waig mimang ahal di apatut kapaganuan laang tawagat sabap ilo kopohompit do kogunoon toinsanan.
Ka dau, koilo nogi rayat do kiguno kopio montok bogian porinta moningolig tana diolo mooi au osuang di tulun ngawi di okon sanganu toiko maganu kosiwatan montok papaharo do koponugkuan aiso kasagaan miampai au maganu kokiraan kokomoi kotundaan om susuai poh.
Pairin ih nogi Montiri Kotundaan Infrastruktur nasantaban ginawo kopio miampai kinapamanaan tosonong abaabayan diti om minangatag nogi tuh tadau miruba tombului kaanu papaharo ontok potitikid duo wulan insan.
Otubayaan isio do maya abaabayan irad diti nogi kapanahak kosiwatan kumaa rayat id watas diti poposuul do kobolingkangan diolo kumaa lansanon rayat kaamung noh boyoon ngawi koupisan ih nakaampi nogi id abaabayan diti.
“Yoho om upisor watas kaamung toinsanan boyoon ngawi koupisan haro liwang togumu montok rumuba tulun ngawi id watas diti montok mogiboboros miampai ahal ngawi di owiton do mogiigion ngawi kinoiyonon.
“Mimang ogumu kopio yolo ih nokorimot pinoposuul do tuwa pomusarahan toiko manahak atag, aplikisin ngawi om pokinsianan ngawi suai montok poposuul do atag ngawi.
“Om mimang montok dogo sabaagi lansanon rayat kopuriman do abaabayan diti kiguno kopio om kikosiwatan tokou nogi montok rumuba tinimungan mororobuat ngawi om moniniaga ngawi id tomu om kikosiwatan montok momoli barangan kogunoon om mokinongou kobolingkangan ngawi diolo,” ka dau.
Mantad dilo ka dau, montok koinsasanai abaabayan ih pinaharo kaanu popoinsomok do piromutan miampai tulun ngawi suai ko mokinongou lobi osomok kagu kobolingkangan diolo miampai sakadai toinsanan upisor om boyoon ngawi koupisan.
Pairin ih nogi Puru Parlimen Keningau minoboros, yolo okon noopo kaanu mogitotoguang miampai dau poposuul do kobolingkangan ngawi pointantu katapi kikosiwatan nogi yolo mitoguang miampai upisor ngawi montok manalasai do kobolingkangan ngawi diolo.
“Ontok baino diti nokosiwat oku ruminuba kiginumu 30 tulun mogigion om haro kagu wookon di au nosiwatan tokou ruminuba om posorohon tokou yolo tuh rumuba miampai upisor ngawi pointantu ontok timpu ngawi upis.
“Monongkotoluod oku kumaa upisor watas om toinsanan upisor ngawi di nokohompit montok songowian ngawi miampai mogigion ngawi hiti sabap nakapanahak karaja di tosonong om nokoposontob ginawo miampai pinirubaan diti,” ka dau.
Alansan isio do kobolingkangan di pinosuul kaamung ih pinaganuan laang kotilombus mooi toinsanan laang ngawi ponugutan dilo mangan posuulo ontok pirubaan timpu rumikot.
“Nasantaban ginawo tokou miampai pinirubaan diti sabap nakaanu tokou nogi kosiwatan montok mongintutun miampai lobi tosomok miampai mogiigion ngawi mantad watas diti,” ka di Puru Lamin Koundangan Pogun (Adun) Tambunan dilo.
Noboros di Pairin, kopinamot miampai abaabayan dilo nakaharo ogi abaabayan pangarangaban monoluod raha om nakaanu minomimung kiginumu 19 pain raha.
Nokotindapou nogi id abaabayan dilo nga ih Upisor Watas Thomas Lojigin, Monunurat Pulitik Komontirian Winakas, Teknologi Otomou om Waig Datuk Daniel Kinsik, Monunurat Pulitik Komontirian Kotundaan Infrastruktur Welfredoline Jakil om Stanis Buandi, Luguan Pulis Watas Deputi Superintenden Douglas Nyeging Taong, Luguan Watas OKK Philip Datuk Kitingan om Momuruan Kotundaan Rayat Tambunan Silverius Bruno.