Ponuhuan manangod Zika
# Musa muhang DBKK, PBT papaharo pitabangan saragagayaan
KOTA KINABALU: Pokionuon di Boyoon Montiri Datuk Seri Musa Aman o Dewan Bandaraya Kota Kinabalu (DBKK) om toinsanan Bogian Monguasa Kinoiyonon (PBT) tuh popotimpuun do pitabangan saragagayaan sumusuhut kes virus Zeka kumoiso ih noilaan id Sabah.
Minoboros isio do PBT kikoompitan kiguno kopio popoingkawas do laang montok papatantu do bogian id siriba kuasa ponorinaan diolo, koidu mantad iyonon pomogontoluan togonok.
Pokionuon nogi di Musa o lansanon rayat om momuruan mogigion montok lobi aparagat papanau do kimpin kopurimanan kokomoi toluor kikoompitan togonok om umampai do kaparagatan mitatabang montok papatantu do koiyonon diolo koidu mantad osiliu iyonon pomogontoluan togonok.
“Ahal diti (virus zika) au obuli intangan agaan. Tokou toinsanan mositi papanau do tonggungan om papatantu mooi do koposorilianan tokou olidang om lamin tokou au pogontoluan togonok ih paparayat do toruol miagal denggi om virus Zika,” ka dau id iso kopoilaan konihab.
Muhang nogi isio PBT montok maganu laang undangundang kumaa diolo di au mokinongou montok momorisi do koiyonon posorili, doulu noh tapak pamansaian di asaru osiliu iyonon pomogontoluan togonok.
Songkosodop Komontirian Kolidasan pinapatantu do kotorimo ruputan kokomoi kes norolihan virus Zika kinoiyonon ih kumoiso id pogun diti.
Sumakit nopo nga songulun kusai kiumur 61 toun kibansa Dusun ih poingiyon id Taman Public Jaya, Likas, Sabah.
Poingkuro poh nga, Boyoon Potunud Kolidasan Datuk Dr Noor Hisham Abdullah pinapatantu do tulun sumakit dilo minidu pogun id jam 5.30 sosodopon songkosodop sabap mogilolongot kobolingkangan tundundu di notoguang dau.
Ka dau, kusai dino nokomoi nogi nakakandai ‘komorbiditi’ miagal akawas raha, toruol lulusou tawak ‘kronik’, ‘karang ginjal’ om gout.
Id tadau Kaapat nakatalib, komontirian dilo pinapatantu do songulun tondu kiumur 58 toun ih poingiyon id Bandar Botanic, Klang, Selangor, ‘positif’ norolihan virus Zika sominggu kalapas minuli mantad Singapura di ontok 21 Ogos. -Bernama