Porinta mokinongou rolou rayat: Salleh

SIPITANG: Au insan porinta mangantob tuwa pomusarahan om mokinongou rolu rayat doulu noh sinakagon tomulok.

Montiri Komunikasi om Multimedia Malaysia ( KKMM), Datuk Seri Dr Salleh Said Keruak minoboros do tinimungan dilo poingkuro poh nga minog popoboros do tuwa pomusarahan (atag) dilo miampai ralan di tototopot om maya ‘forum’ di totopot.

“Sinakagon tomulok minog haro katabaian mamagatang toiko manapis tujuan kimpin di poonjuron do tinan pointantu mooi do au kopomiraag timpu tabantalan.

“Baino kiharo tinan di aiso tonggungan mananom kotukanaan/ karaatan nokomoi pomorinta om momoguno do ‘ sentimen’ tinaru om agama gisom kopongimbulai do katangaban om pibabakan id pialatan rayat.

“Tinan dilo momoguno do tinimungan tomulok doulu noh susumikul ngawi om poposiliu do talun alun sabaagi tiyonon popolombus do rolou ginawo,” ka disio.

Id ahal dilo, pinosorou nogi di Salleh o tulun ngawi tuh kiharo toilalaan mooi kaanu mamagatang om manaring kotopotan toiso-iso ahal ‘viral’ idsuang media sosial.

Kawagu disio, pibabakan om pomusarahan di kakaal kuasaon do tulun ngawi labus momiraag noopo do agenda kotundaan pogun.

“Tantu noh do ogumu kagu pamalanan kotundaan mangan owiton di momuruan ngawi hiti, katapi onu ih kiguno nga rayat mositi manahak pisokodungan poimponu.

“Sundung pia haro pisuaian pialatan dotokou, ilo ahal koubasanan id nonggo- nonggo tinan, nga tokou kakaal obuli miiso id ogumu kopiiradan sokurang-kurang idsuang apat ahal.

“Koiso, muhang tokou mintong pogun tokou otoonong om aandang, koduo; papatantu do pogun agaras montok popotounda pogun, kotolu; kotundaan di owiton haro koompitan miampai ekonomi om kosiwatan pakarajaan om kolimpupuson; kaanu porinta papatantu do kaandangan tinaru om pisokodungan togirot pialatan Koporintaan Pogun om Pisompuruan montok popomilo do kotundaan kotilombus kaanu papanau,” ka disio.

Noboros disio ahal dilo ontok pinotimpuun do ‘ Program Semarak Komuniti 1Malaysia’ Nayatan Pogun hiti, sodop konihab.

Nokotindapou nogi Exco Kopoilaan Pogun ih nogi Puru Parlimen Sipitang, Datuk Sapawi Ahmad, Panakadai Montiri Ponombuluian, Koubasanan om Kinoiyonon Posorili Sabah Datuk Kamarlin Ombi, Adun Sindumin, Datuk Ahmad Bujang om Kumoduo Luguan Potunud ( Ponorinaan) Koupisan Kopoilaan, Datuk Almain Ajirul.

Id ningkokoton kikoompitan, pinoboros nogi di Salleh do popotunda o KKMM do ‘ prasarana jalur lebar’ montok momogonop do kogunoon rayat id bogian pedalaman.

Nosuhu nogi disio Tinan Komunikasi o Multimedia Malaysia (SKMM) montok mindahu gana om mogiboboros miampai momuruan ngawi songkoiyonon montok mongintong om mamalan kogunoon dilo.

Pinatarang disio, nunu noopo kaantaban mangan salasayo do KKMM montok papaharo do timpu pomogunan miampai aiso piwolitan, katanud miampai pokirikotan 95 paratus watas id pogun diti alapusan ‘jalur lebar’ ontok toun 2020.

Ka disio, kounalan dilo kaanu manahak asil kumaa rayat montok popoingkawas konuonuan (ekonomi), kosiwatan pakarajaan, popogirot do piromutan paganakan om tulun ngawi kaamung noh papalaab do kopoluyungan piromutan miampai pomogunan labus.

Boyoon ‘konvoi’ papatahak do Jalur Gemilang (Bondira Malaysia) kuminaa Salleh om Bondira Pogun Sabah kuminaa Sapawi (tolu mantad wanan).

Salleh intangan di Sapawi ( gibang) ontok minonulis ngaran disio id buuk kotombuluian id Gerai Komuniti 1Malaysia.

Salleh suminain id kain pawaladon ‘Iso Ginawo’ id gerai K1M.

Salleh songowian Sapawi (tanga) om Ahmad (gibang) suminakai korita linumisan pakaayan doid Pantas Tagayo id Esplanade Sipitang.

Sapawi (apat mantad gibang) ontok pinopoboros toiso-iso ahal miampai Salleh.

Konvoi Motosikal Kembara Jalur Gemilang tumimpuun sumuang liwang tagayo pantas.