DBKK popoingkawas karaja manamong kolidangan, Komiti Panamangan Toruol Rumoliu pinawakas sumusuhut kes Zika
KOTA KINABALU: Nakawakas noh Dewan Bandaraya Kota Kinabalu (DBKK) o Komiti Panamangan Toruol Rumoliu bogian Kakadaian Tagayo Kota Kinabalu.
Mayor Bandaraya Kota Kinabalu, Datuk Yeo Boon Hai, minoboros do minaganu laang dilo sumusuhut kes virus Zika pinoruput id Taman Public Jaya, Likas, id longkod pogun duo tadau nakatalib.
“Komiti Panamangan Toruol Rumoliu bogian Kakadaian Tagayo Kota Kinabalu aparagat noh. Komiti diti kopohompit do laang misompuru DBKK songowian Upis Kolidasan Bogian Kota Kinabalu,” ka dau.
Tumanud dau, pialatan laang di pinapanau nga kaparagatan ‘fogging’ om kakapan doid potitikid lamin montok manahak do tutuduk panamangan kolidangan id koiyonon dilo.
“Pinoingkawas nogi DBKK o karaja pomolidangan siyamut, parit om koiyonon alaab. Om kolidangan bogian tapak pamansaian nogi porisaon mantad timpu doid iso timpu.
“Yolo ih noilaan mangayamut do koiyonon posorili mangan ontoko danda au kolobi RM500 id siriba Undang-Undang Tokoodo Anti Sampa Sarap,” ka dau.
Idsuang ahal dilo, pinosorou di Yeo o tulun togumu mooi kopomolidang do posorili lamin mantad nunu noopo sampa toiko bagas di obuli popouhung waig miagal bagas pinomolopot taakanon, tin taakanan/tiinumon, toinsanan kawo butul/polositik/ soromin, pasu bunga om susuai poh.
Pinosorou nogi disio o mogigion montok papatantu do koiyonon idsuang lamin nogi nga oborisi om ongoulud.
“Nunu noopo kopomohuungan waig miagal mangkuk pagawasan, sinki, tangki waig minog do potontuon pointutub om au osuang do togonok. Tung ngawi sampa mositi do toririmo pointutub om au kopomohuung waig,” ka dau.
Tumanud dau, tulun togumu obuli poporuput kumaa DBKK sokiro ko haro kobolingkangan kopomuhuan sampa, parit nosonsong toiko nung haro koiyonon lamin id songindoros di ayamut, au tinorina miampai tososonong om aiso tulun poingiyon.
Ruputan obuli patahakon maya numbur DBKK 010-2222000 (WhatsApp) toiko 088-210011 (timpu upis).