Pinoniisan raha tolu puru paganakan munggui Zika ‘negatif virus’ - MPK
KLANG: Koputusan poniisan raha kumaa tolu puru paganakan poinsosomok munggui virus Zika id Bandar Botanic, Klang, noilaan ‘negatif’ virus dino nokomoi, ka di Potunud Kolidasan Konsol Kakadaian Klang (MPK) Azmi Muji.
Minoboros isio do sampel raha om kapatantuan winonsoi do Hospital Sungai Buloh ino nopo nga tiyonon munggui tondu dilo pinokiubatan om pinoruput id koyuon osonong.
“Sampel raha naanu mantad tolu puru paganakan ino nopo nga sawo, tanak kusai om takak munggui,” ka dau ontok romuto monunurat abar id Ambang Botanik hiti konihab.
Malaysia nokoponurat kes kumoiso soira tondu kiumur 58 toun dilo pinatantu do ‘positif’ norilian virus dilo kalapas minuli mantad Singapura di ontok 21 Ogos nakatalib.
Songkosodop, Boyoon Potunud Kolidasan Datuk Dr Hisham Abdullah pinapatantu do songulun kusai kiumur 61 toun ih poingiyon id Taman Public Jaya, Likas, Sabah ih ponogi kes norolian virus Zika kinoiyonon kumoiso id pogun diti, minidu pogun id sosodopon songkosodop sabap mogilolongot (komplikasi) kobolingkangan tundundu di notoguang dau.
Id ahal dilo, noboros di Azmi do MPK papanau do laang pomunsoan kinarayatan Zika id lamin sumakit tondu dino nokomoi pialatan dino miampai minomunso do tiyonon pomogontoluan togonok, pangalabou’an om mamasang tungkasip montok mongilo ginumu togonok id koiyonon dilo.
Tumanud dau, laang pomunsoan om panamangan virus dilo nopo nga miirad nopo miampai toruol toruol saasak (demam denggi).
“Kosuabon diti ( konihab), pinapaharo tokou do pitabangan songowian mogigion bogian Taman Ambang Botanik sabaagi laang pomunsoan virus zika. Tumilombus tokou papaharo laang pomunsoan id bogian dilo kopohompit do 822 unit lamin.
Namot dilo, Puru MPK Robert Choo minoboros do tumanud pinongintoban poompus Julai nakatalib, mantad 3,701 lamin ih pinorisa pinagarawatan id pointongkop Klang, 103 lamin noilaan haro tiyonon pomogontoluan togonok. - Bernama