Lisin mongindapu iduon nung au tumanud do ponuhuan ERT
KOTA KINABALU: Mongindapu ponombuluian id Pulau Mantanani kotoguang miampai kobolingkangan kopongiduan lisin kotorinaan sokiro ko au kaanu tumanud ponuhuan ih pinalabus mantad Tinimungan Laang Kaagaban (ERT).
Potunud Upis Komontirian Ponombuluian om Koubasanan Malaysia Pogun Sabah ( MOTAC) Ahmad Zaki Abu Bakar minoboros, sokiro ko kiharo mongindapu di au tuminanud ponuhuan dilo, posuulon do MOTAC ahal dilo doid Koupisan Koumoligan om Kolidasan Pakarajaan.
“Sokiro ko mongindapu diti ontokon ‘kompaun’ sundung pia miampai minimum RM500 noopo, MOTAC haro kuasa montok mongidu lisin mongindapu diti miampai osondikot.
“Baino nokopomolohou tokou toinsanan mongindapu ponombuluian id pulou diti montok monginwagu ponorinaan ‘ Prosedur Operasi Standard’ (SOP) hinonggo monginsonong tokou SOP diti montok papatantu do koumoligan tutumombului ih rumikot id pulou diti,” ka dau kuminaa monunurat abar id iso abaabayan ‘ intatllation art by the bay @ KK 2016’ hiti konihab.
Minoboros isio do ERT dilo buruanan di Porosiden Koisaan Ponombuluian Sabah, Tony Chew. ERT dilo papatantu do pabanaron nangku o mongindapu bot ponombuluian papanau kaparagatan tumanud do kooyuon tawan insan timpu.
Ka dau, sokiro ko kooyuon tawan au papabanar, om ponuhuan ERT montok monuhu do mongindapu bot ponombuluian mongidu do kaparagatan pointantu do tonudon.
“Mongindapu ngawi ponombuluian potontuon montok momoguno do ‘Sistem Penentu Kedudukan Global’ (GPS) om ipistol suari.
“Mongindapu di oilaan momoguno do ‘ jeti’ tolosok gisom antakan koligaganan nogi mangan ontoko laang pongiduan lisin,” ka dau.
Namot dilo, noboros di Tony, baino kiharo 15 tinan mongindapu bot ponombuluian ih papanau kaparagatan id Pulau Mantanani om sokiro ko kiharo mongindapu wagu id pulou diti, pokionuon nogi yolo tumanud do ponuhuan dilo.
Pogului dilo, noboros di Ahmad Zaki do kimpin ‘eco art’ ih pinaharo id Waterfront Segama nopo nga montok kumotolu pinaharo hinonggo abaabayan ih iso’i nakaharo noh id Tanjung Aru om Tanjung Lipat id toun-toun pogului dilo.
“Iti nopo nga iso kagu gatang pomoruang kumaa asil kakamot kapalabusan ponombuluian id Sabah hinonggo ino kaanu mamagayat tutumombului montok rumikot om mongintong sondiri ‘seni’ ih naanu minomonsoi.
“Kiharo 14 tinimungan ih nakatanud noh abaabayan diti miampai minonupu ‘seni-seni tiga dimensi’ minomoguno barangan giniling kawagu,” ka dau.
Tumanud dau, kimpin dilo nogi kiguno kopio montok poposoribau do kopurimanan kumaa tulun ngawi nokomoi do kiguno kopio mintamong om moningolig tomposion om kinoiyonon posorili.