Koporintaan BN au insan ponguwudut rayat: Isnin
BEAUFORT: Au insan koporintaan Barisan Nasional (BN) monguwudut/monombirang kumaa rayat katapi toririmo minggisom papanau karaja montok rayat.
Boyoon Umno Bogian Beaufort Datuk Isnin Haji Aliasnih minoboros, onu ih pinoboros do koporintaan BN tatap potopoton.
“Soira koporintaan BN moboros do kobolingkangan rayat onuan do pongintangan, ino tatap potopoton om koporintaan nogi okon ko mimboros noopo katapi minggisom montok monulung manalasai do kobolingkangan dilo,” ka disio.
Noboros disio ahal dilo ontok romuto kalapas minongoruhang Kumoduo Boyoon Montiri Tan Sri Joseph Pairin Kitingan ih pinapaharo do kakapan doid watas diti montok mongintong kobolingkangan kapanahakan waig di notoguang do mogigion Beaufort om Kuala Penyu.
Pairin ih nogi Montiri Kotundaan Infrastruktur kuminakap nogi longkod waig ih masaon wonsoyon om opongo doti poimponu longkod waig dilo ontok Disember diti.
“Kikosianan kopio porinta miampai kobolingkangan di notoguang rayat om toririmo minggisom montok papatantu do kobolingkangan dilo okon mongorulan noopo katapi nogi mangan salasayo,” kawagu di Isnin.
Tumanud disio, panandasan ih minoboros do kobolingkangan rayat au podulionon do koorintaan BN nopo nga pongindaraatan noopo.
Ka disio, pongindaraatan dilo tomodon parayaton mimboros sabap muhang poposout mato rayat om nogi muhang popoompuong pomusarahan rayat.
Minoboros isio do BN nopo nga porinta ih toririmo papatantu do potitikid batos dau potopoton om onu ih wonsoyon nopo nga montok rayat.
“Okon noopo kobolingkangan waig katapi mogisusuai kobolingkangan suai nogi onuan nogi do porinta pongintangan totootpot om rayat sondiri obuli mongintong onu ih winonsoi do koporintaan BN idsuang DUN Klias,” ka disio.
Kawagu disio, DUN Klias linansanan di gugumaga katapi toinsanan kobolingkangan di notoguang rayat salasayon do BN.
Idsuang ahal dilo, minomisunud Isnin do rayat id DUN dilo alansan kopio kaanu mamagatang onu ih wonsoyon do BN om onu ih wonsoyon do gugumaga (pembangkang).
Tumanud disio, kobolingkangan rayat id DUN Klias tantu noh do kaanu manalasai tosisikap sokiro ko DUN dilo linansanan do BN om okon ko gugumaga.
“Koilo noopo gugumaga do mimboros katapi au kaanu manalasai do kobolingkangan di notoguan rayat om rayat mositi koilo do BN noh ih manahak pongintangan nokomoi kobolingkangan di notoguang diolo,” kawagu disio.
Pogului kuminakap longkod (loji) waig dino nokomoi, kinoruhang nogi di Isnin ih Pairin id timpu pinirubaan om manahak boboroson kopointarangan kokomoi ahal kapanahakan waig Beaufort om Kuala Penyu. Timpu pinirubaan om ‘taklimat’ dilo notindapou nogi di Potunud Koupisan Waig Sabah.