66 PTI natahan id kaparagatan poimbia id S’kan om Lahad Datu
# Nahau nogi piipiro barangan tolosok kaamung tumau pogonsok, bot om injin
SANDAKAN: Kiginumu 66 modidikot aiso kasagaan (PTI) tinahan do bogian monguasa maya kaparagatan poimbida hiti om Lahad Datu.
Nahau nogi bot om injin om mogisusuai barangan di owiton daa lumabus miampai aiso kasagaan.
Id kaparagatan tolu tadau dilo nopupusan di tadau Kaapat nakatalib, Tinimungan Pulis Marin (PPM) minanahan 37 PTI id kawaigan daat Sandakan.
Komander PPM Wilayah 4 Sabah ACP Mohamad Madun minoboros do pinongintongan totootopot kaparagatan pinapanau id kawaigan daat Sungai Batu 2 gisom doid kawaigan daa Tabangka kopohompit do kawaigan Pulau Nunuyan.
Minoboros isio do yolo ih natahan kaampai mantad 17 tulun kusai nosukod, 14 tondu nosukod, apat tangaanak kusai om tangaanak tondu ih kiumur pialatan 4 gisom 54 toun sabap aiso nunuunu surat pindalanan om kopongintutunan tinan di totopot.
“Natahan nogi apat tulun kusai rayat Filipina ih nosiliu ‘juragan’ bot, om nakapamagahau nogi iso pom bot songowian injin om tolu tinan bot osiau miampai injin 30 HP om 40 HP ih koinsasanai piaga-aga kigatang RM39,905,” ka dau.
Ka dau, nahau nogi id kaparagatan dilo nga kiginumu 37 kotak (629 paket/kg) tumau pogonsok ih kigatang RM1,572.50 kikotumbayaan montok owiton lumabus miampai aiso kasagaan.
Minoboros Mohamad do kinagakaman koiso di ontok 20 September kiikira jam 12.30 tanga sodop id kawaigan daat Nunuyan, nakapanahan o bogian dau do walu tulun PTI om minamagahau iso bot osiau miampai iso injin 30 HP.
Kinagakaman koduo ontok tadau iso’i kiikira jam 12.30 tangadau id Tanjung Lihak-Lihak Tabangka, nakapamagahau o bogian dau do kiginumu 629 lopot tumau pogonsok.
Kinagakaman kotolu di ontok 21 September kiikira jam 12.30 tangadau id talun bakau, Tanjung Nunuyan, kiginumu 20 tulun PTI tinahan om iso bot osiau miampai iso unit injin 40 HP nahau.
Id Lahad Datu, Bogian Koumoligan Poimbida Papak Kosilahon Sabah (Esscom) miampai minisokodung piipiro agensi koumoligan nakaanu pinapakakung do ponginaman 29 PTI lumosok sumuang doid pogun diti maya ralan daat.
Komander Esscom DCP Dato’ Wan Abdul Bari Wan Abdul Khalid minoboros do koinsanai diolo ih natahan kiumur 4 gisom 54 toun kikotumbayaan do rayat Filipina.
“Tinahan yolo sabap aiso surat kointutunan tinan di totopot om patahakon doid Koupisan Imigresen montok laang potilombus,” ka dau.
Namot id iso kagu kaparagatan id Semporna di tadau Koduo nakatalib, minoboros isio do PPM Semporna nakapanahan songulun kusai rayat Myanmar kiumur 37 toun sabap kikotumbayaan mogowit lumabus 17 gelen tumau petrol id kawaigan Pulau Omadal, Semporna.
Nakapamagahau nogi iso poduu songowian duo unit injin potoyidon jenama Yamaha 40 HP kigatang RM29,267.