150 paganakan posorili Tungku nokotorimo tangki waig 1Malaysia
TUNGKU: Kiginumu 150 suang lamin mantad posorili watas diti nokotorimo sakadai tangki waig 1Malaysia ih pinaharo id Dewan Seri Panglima Ladtang Kampung Segangan, doros hiti, konihab.
Puru Lamin Koundangan Pogun (Adun) Tungku, Datuk Mohd Suhaili Said minoboros do pinamahagian tangki waig 1Malaysia dilo alansan kaanu monulung rayat labus kakadaian montok popoopi kokorui waig mooi do au kotoguang kobolingkangan aiso waig tolidang doulu noh ontok kotoguang oputulan kapanahakan waig.
“Ponguhupan diti alansan kopio kaanu momoguno tososonong kumaa di nokoponorimo sabap kapanahakan waig di posodia haro au doti oilaan opututan sumusuhut kobolingkangan di au kaanu mongilag,” ka dau.
“Poingkuro poh nga, karaja aparagat di potilombus montok papatantu do kapanahakan waig korikot id potitikid lamin id kampung- kampung id Tungku tatap osiliu kopoguluonan porinta sabap kounalan kiguno kopio diti nopo nga kogunoon tagayo mogiigion,” ka dau ontok romuto kalapas pinababai do kapanahakan sakadai dilo.
Suhaili ih nogi Ponorikohon Tinan Ugama Silam Sabah minoboros do soosomok koinsasanai kampung id DUN Tungku nakaanu kounalan kapanahakan waig tolidang au kohompit piipiro kampung miagal Tambisan, Bengingod, Tanjung Labian om psorili dilo.
Minongomi potilombus, noboros disio do koinsanai kampung dilo kaanu doti kapanahakan waig tolidang do au no alaid soira projik pamansaian loji om pamasangan paip opongo.
Tumanud dau, toririmo porinta mokinongou pongimbarasan rayat om momuruan gamut sakot mositi tumilombus minsuang kakampungan mooi do toinsanan kobolingkangan korikot doid toilalaan om kapaganu laang mantad bogian pointantu. Nokotindapou nogi id ramai dilo nga ih Ponulung Upisor Watas Tokoodo Tungku Jablee Jaratul, Momuruan Kotundaan Rayat DUN Tungku Abdul Momen Angchai, Boyoon Watas Tokoodo Tungku Kamarudin Hamid.