Tana nopiang pinopotongob do mongingia SK Tagudon Lama
RANAU : Tinimungan mongingia ngawi iso sikul tosuriba hiti norosian ontok sodop Kotolu nakatalib soira nuluw poingoros iso mantad linominon id sikulan dilo nopiang om nokoimamang tolig linominon dilo.
Osonong ma tuh id kinantakan kiikira jam 7.00 dongosodop id Sikul Kabansaan (SK) Tagudon Lama dilo aiso tulun di nosindualan sundung pia kiharo mintamong om mongingia ih poigiyon id kuaters songindoros.
Luguan Upisor Balajaran Watas (KPPD) Ranau Siti Hamne Hashim ontok romuto minomisunud do kinantakan dilo nopo nga ih kumoinsan nogi nantakan id sikulan dilo om ahal koyuon tawan kinontodonon doti do kinobpiangan tana otidong dilo.
“Kinantakan tana nobpiang nantakan sodop songkosodop soira ruminasam asapou mantad podi tadau Koduo nakatalib. Koyuon okoring di alaid kopio pogului diti kinontodonon doti do noluau tana dilo.
“Rasam tasapou kinontodon doti do tolig poingoros linominon kalas id iso disan sikul dilo angalamou. Pinongintongan di pinapanau tokou nokopokito do burutak/ rana om waig olobou lumuyung id bogian dilo,” ka dau.
Poingkuro poh nga pinatantu di Hamne do kooyuon nopo nga natamangan hinonggo nulud do bogian sikul o susumikul ngawi di apatut do balajar id kalas dilo montok pambalajaran id kalas naamot id sikul dilo.
“Nokopokianu tokou noh Guru besar SK Tagudon Lama Hamdan Taip montok papatantu do toinsanan barangan om koumatan ngawi kiguno om surat kiguno id linominon powolihon doid linominon suai di au kotoguang kobolingkangan sabaagi laang tosikap sumodia tumoguang nunu noopo kaantakan di au osonong.
“Nokopomonsoi tokou nogi ruputan doid Koupisan Balajaran Pogun om nogi minomonsoi ruputan doid Koupisan Talun Alun (JKR) Watas Ranau montok momorisa koyuon nuluw toiko tana otidong dilo,” ka dau.
Ka dau, gisom baino diti iso nogi kinantakan irad dilo pinoruput id posorili watas hiti om pinapatantu do timpu koposikulan om pambalajaran id SK Tagudon Lama kapanau miagal koubasanan ontok tadau Kaapat.
Tumanud dau, SK Tagudon Lama ih poinsumpak kiikira 36 Kilometer mantad Kakadaian Ranau kiharo 64 tulun susumikul ‘pra’ sikul om 13 tulun mongingia.