JFL pamagayatan wagu pomorunan ponombuluian id Sabah
KOTA KINABALU: Kopomogihuman ‘jaguh’ abaaabayan Jesselton Fight League (JFL), pialaan moningolig tinan ih momoguno do ‘teknik’ Moningolig Tinan Nalangatan osiliu iso kagu pamagayatan id pomorunan ponombuluian id Sabah.
Potunud Upis Komontirian Ponombuluian om Koubasanan Malaysia (MOTAC) Sabah Ag Ahmad Zaki Abd Bakar minoboros do panganjuran JFL okitonan osonong kopio montok papalaku do sipoot mongumolig tinan sabaagi iso kagu pango toiko pamagayatan kawawagu ponombuluian id pogun diti.
“Tulun ngawi mantad labus pogun ih korikot okon noopo kaanu tumanud om mongintong do pialaan dilo nga kapaganu kosiwatan montok sumuti hiti. Ino nogi kaanu monulung popoingkawas kagu pomorunan ponombuluian id Sabah,” ka dau kumaa monunurat abar id JFL 2016 ih pinaharo id 1Borneo Shopping Mall, doros hiti konihab.
JFL2016 nopo nga onjuron MOTAC Sabah miampai pisokodungan Karabaw Martial Arts & Fitness Centre nampayat di kiginumu 24 tulun mantad Amerika Syarikat, Vietnam, Brunei, Filipina, Australia, India, Singapura om Indonesia om onom tulun mantad Malaysia mogisasaap winakas momoguno do ‘teknik-teknik’ Moningolig Tinan Nalangatan.
Namot dilo, Minonimpuun Karabaw Martial Arts & Fitness Centre, Rayner Kinsiong minoboros do JFL ih pinoturidong mantad podi tolu toun nakatalib pohoroon miampai ‘liga’ om ino ponogi toiso-iso pialaan id Malaysia ih manahak kosiwatan kumaa mampayat ngawi montok monimung mato montok umampai pialaan World Series of Fighting Global Championship (WSOFGC).
“JFL nakaanjur noh mantad podi tolu toun nakatalib. Nga iti nopo nga kumoinsan nogi pinanjur pisokodungan miampai MOTAC Sabah om maya panganjuran diti kaanu mongukan kosiwatan montok monoribau toilalaan/kobulihan tanak kinoiyonon id kaganaan diti,” ka disio.
Minoboros isio do nakapaharo noh bogian diolo do pogibabarasan miampai MOTAC Sabah montok papaharo do JFL miampai poinggagayo ontok toun tabantalan.
“Montok panganjuran dilo otumbayaan tokou k kaanu koponorimo ogumu kaampayatan mantad labus pogun om alansan kopio oku ino kaanu monulung papalaku toiko popointutun kagu do moningolig toiko gumaga tinan diti,” ka disio. -Bernama