Songulun nokopinsin mongingia dinuso di tambalut dau
KOTA KINABALU: Songuhun nokopinsin mongingia dinuso id lamin tiyonon dau id Kepayan Ridge hiti di tadau Kolimo nakatalib.
Munggui nointutunan sabaagi Ngui Lim Kiau,64, nopo nga songulun bagas mongingia id SJKC Shantao, Austral Park nokito noduso miampai waya pinanabakan id tolikud munggui id liwang tombului lamin dau kiikira jam 3 sosodopon.
Munggui kikotumbayaan tinobok minomoguno do iso pisau di poingiyon doros lamin dau ih kikotumbayaan haro kobolingkangan pomusarahan.
Luguan Pulis Watas Kota Kinabalu Asisten Komisioner M. Chandra minoboros do tinahan nogi pulis o ‘suspek’ kinantakan ih ponogi songulun tondu kiumur 65 toun id tampat kinantakan.
“Nokokito nogi pulis o sinjata ih kikotumbayaan ginuno id kinantakan dilo, iso pisau kininaru walu insi,” ka dau.
Ka disio, pinonoriukan timpuunon dilo nokoilo do suspek dino minoi id lamin munggui kalapas linohou di munggui kiikira jam 2 sosodopon.
“Goduo-duo munggui om suspek nopo nga miambalut om poingiyon mitimbangtimbang/mioros lobi noh limo toun om asasaru yolo magawi timpu sopiduduo.
“Otumbayaan o pulis do kinantakan dilo nantakan soira goduo- duo diolo maamaso mirumoh-rumoh gisom suspek tuminogod sabap au nokopirati.
“Au nokopirati dino kinontodonon suspek pinapalabus pisau mantad paket dau om sinindikot minonobok tolikud munggui, onom insi id siriba tulu,” ka dau.
Minoboros Chandra do suspek minogowit pisau sabap id timpuunon dilo momutul daa suspek dino do roun punti id tohuri lamin dau katapi linohou di suspek rumikot id lamin dau.
Ka dau, soira nokoilo ih suspek minonobok tambalut dau, monulung daa suspek montok manampasi munggui om minomolohou tabang dau montok kapaganu do ponulungan.
Poingkuro poh nga ka dau, munggui pinatantu do minidu pogun soira tinimungan pulis nokorikot id tampat kinantakan id kiikira jam 4.20 sosodopon.
Minoboros Chandra do kopuriman do au asanang ginawo suspek miampai laang dau gisom kinontodonon minaganu laang minoninduol tinan dau miampai pigison daa dau o lunggayan longon om liou dau katapi tiningkadan di poingion doros ih susuai.
Otumbayaan nogi ih Chandra do suspek dino nogi nokoumbal pinokiubatan miampai tabaal psikiatri om di kawawagu pinoidu mantad Hospital Mesra Bukit Padang.
“Natahan noh do pulis o suspek dilo om pinatahak doid Hospital Mesra Bukit Padang montok laang potilombus.
“Kes diti soriukon tumanud Seksyen 302 Kanun Koinggoritan sabap minongoduso,” ka dau.