Kokomoi kes kasala momoguno kuasa om susuap projek infrastruktur kigatang RM3.3 bilion Potunud pinoidu miampai jaminan RM500,000
KOTA KINABALU: Songulun potunud koupisan porinta id Sabah ih tinahan reman kokomoi kes kasala momoguno kuasa om susuap projek infrastruktur kigatang RM3.3 bilion, pinoidu miampai kogos jamin koniab.
Kotos ih osomok miampai tinimungan ponoriukan Tinan Monorina Pomunsaan Susuap Malaysia (SPRM) minoboros do potunud dilo pinoidu do Majistret Stephanie Sharron Abbie miampai kogos jamin RM500,000 aiso deposit miampai duo panjamin, id jam 1 tangadau koniab.
Ontok 11 Oktober nakatalib, SPRM pinabanar minanahan reman potunud dilo solinaid limo tadau kagu, kalapas timpu tahanan reman turu tadau mantad podi 5 Oktober nakatalib naawi.
Tumanud kotos dilo, timpu tahanan reman kumaa apat tulun suai kaamung bagas kumoduo potunud koupisan porinta ih tinahan ontok tadau Kolimo opupusan ontok 18 Oktober diti.
Kawagu kotos dilo SPRM popotilombus ponoriukan kaamung poporikud kopoilaan om monimung ‘bukti’ kokomoi kes dilo.
Gisom baino diti SPRM nokoponiip noh boros ngawi 82 saksi kokomoi ponoriukan kes dilo, kawagu kotos dilo.
Kumoduo Boyoon Tinan Monorina (Operasi) SPRM Datuk Azam Baki ontok romuto pinapatantu do ahal dilo.
Au nogi disio olimon do lobi ogumu kagu saksi mangan lohowo montok monulung ponoriukan kes dilo.
SPRM minanahan limo tulun dino nokomoi montok monulung ponoriukan dino ih nogi kes poinggagayo id susuian SPRM.
Tinan monorina dilo pialatan suai nogi minamagahau lobi RM114.5 riong, barang amas kigatang RM3.64 riong om kiginumu 127 garan tana piaga-aga do kigatang RM30 riong.
Ponoriukan kes dilo papanaon tumanud Seksyen 18 Akta SPRM, Seksyen 17(a) Akta SPRM, Seksyen 23 Akta SPRM, Seksyen 132 Akta Syarikat, Seksyen 165 Kanun Koinggoritan om Akta Ponimbanan Tusin Tolosok. -Bernama