Pulis minonugku tuu tampat pongizonan ‘setinggan’, tuu hamin nuzas, 41 PTI tinaan
KOTA KINABALU: Kiginumu tuu tampat pongizonan hamin aiso kasagaan ( setinggan) posoihi kakadazan tagazo sinugkuan id ‘Ops Bersepadu’ Modidikot Aiso Kasagaan (PTI) di tadau Koonom nakatahib.
Huguan Pulis Uvang Kota Kinabalu Asisten Komisioner M. Chandra minoboos do operasi sohinaid 10 jam tuminimpuun jam 1 minsusuab dino nakaanu minanaan soginumu 41 PTI.
Ka disido tampat ih nokoompit kaamung no pongizonan ‘ setinggan’ boogizan Batu 5 Lahan Tuaran Bypass, Lembaga Padi, Batu 6 Inanam, Kampung Delima, Kampung Juara 1 Sulaman, douvi tamu KPD om douvi Istana Pogun Sabah.
Tumanud dau koinsanai ih nataan kopoompit d layat Filipina kaamung duvo kusai ih nataan sabap kahasaan dadah.
“Goduvo- duvo kusai dino soizukon tumanud Seksyen 12 (2) (a) Akta Dadah Kohigogon (ADB) 1952.
“Tahanan suvai kopoompit 16 tuhun nosukod iho nopo nga sizam kusai om tuu tondu kiumul binduugan 25 gisom 55 toun.
“Nataan nogi kiginumu 23 sumukod nogi kiumul 14 gisom 16 toun iho nopo nga 10 kusai om 13 tondu,” ka disido id iso kopoihaan doiti koniab.
Ka disido PTI ih nataan novit doid lokap kihongkod Kota Kinabalu kahapas kopoindahanan ‘ dokumentasi’ pinapanau id Hongkod Upis Pulis Uvang (IPD) Kota Kinabalu.
Minoboos Chandra do pinongintongan tampat papanau kalaja dino nokomoi montok momunso kapaagatan koimaan talaat id boogizan di dinadi do sabaagi lumun tuhun talaat om kapatazadan dadah id boogizan kakadazan tagazo.
Tumanud disido, tuu tinan hamin nuzas id operasi dino om duvo hamin notutudan sabap wayol pinohuzungan kalon.
“Operasi pinonguzasan hamin papanaon do Dewan Bandaraya Kota Kinabalu (DBKK).
“Piipio kinontodonon kapanaakan lotilik id boogizan nokoompit nogi pinutu do Sabah Electricity Sdn Bhd (SESB),” ka disido.