Kada tolikudai ralan mongubat kawawagu bato susu: Hamisa

TAWAU: Pokionuon o tinimungan koonduan tuh au monolikud do poingkuro kopongubatan kawawagu id lamin pongusapan sundung pia muhang kapaganu do pongubatan ‘alternatif’ montok mongubat bato susu (kanser payudara).

Panakadai Montiri Kotundaan Kotos om Koburuon Teknologi Kopoilaan Sabah, Datuk Hamisa Samat minoboros do laang au momoguno do pongubatan lamin pongusapan kontodonon noopo do bato rumalad om osusa mongubat, om oruhangan soira ralan pongubatan poinsosonong ih pinili dilo aiso asil.

“Tinimungan tondu mositi mintamong kolidasan om asaru papanau do pomorisaan susu (payudara) miampai sondiri om obuli kapaganu do pongubatan ponugutan id lamin pongusapan,” ka dau ontok minanahak boboroson id Abaabayan Kopurimanan Susu id Padang Bandaran Tawau hiti koniab.

Ka dau, bato (kanser payudara) au obuli intangan aiso guno sabap toruol dilo nopo nga pamatai tagayo tondu miampai koligogon inlimo kogumu kumaa tondu ih haro susuian ino nopo nga tina toiko miadiadik tondu sabaagi kitoruol bato susu.

“Yolo ih poingkakawas koligogon kakandai toluor diti nopo nga tinimungan kiumur 40 gisom 49 toun om 50 gisom 59 toun,” ka dau.

Montok dilo, minoboros Hamisa do koulalahon au monongkoilo om toilalaan di oribau kokomoi ‘kanser’ osiliu kontodonon koingkawasan rontob kapataion kumaa tinimungan koonduan id pogun diti.

“Tumanud ruputan Koporijistaran Kanser Kabansaan, ogumu tulun sumakit rumikot odomut doid lamin pongusapan montok kapaganu do pongubatan ino nopo nga 42 paratus tulun sumakit poingamung noh id rontob tolu om apat,” ka dau.

Tumanud dau, nokoruput nogi 32 paratus mantad toinsanan kawo bato noilaan noh id tinimungan koonduan pogun diti ih kiumur 45 toun om minsawat.

“Alansan kopio oku potitikid puru tulun ngawi om agensi porinta kaamung noh kotinanan okon porinta (NGO) monulung Komontirian Kolidasan miampai manganjur do kimpin kopurimanan momunso ‘kanser payudara’ (bato susu),” ka dau.

Pogului, abaabayan pinanjur Kinabalu Pink Ribbon dilo nampayat di 2,000 tulun ih minangkus kisinodu tolu kilometer om nogi nampayat di Hamisa om Luguan Pulis Watas Tawau ACP Fadil Marsus.Bernama