Kosoduo pialaan Pigusaan Mindakod Sompomogunan Nuluw Nabalu pinoniba sabap ologod tongus

KUNDASANG: Kosoduo kiikira 6 kilometer montok mindakod om mindahu Nuluw Nabalu noidu ontok pialaan Mindakod Sompomogunan Nuluw Nabalu ko-29 sabap do ologod tongus..

Potunud pigusaan Zachary Mobijohn minoboros do sabaagi laang koumoligan, mampayat ngawi pialaan bulun noh korikot id Sulap Raban Rata id nuluw kilinangkou 4,095 meter dilo pogului mindahu kawagu.

“Koupisan Meteorologi pinoporuput do nantakan tongus ‘taufan’ sundung pia Sabah nakakandai ‘tikiu’ taufan noopo, nga laang miingat-ingat mositi onuon.

“Soira pigusaan tuminimpuun jam 7 kosuabon, koyuon kitongus miampai kisiniau 30km sojam om kosoduo kopongintongan id kawas nopo nga kiikira 10 meter sabap akapal aun,” ka dau ontok romuto do monunurat abar id garisan koowion pialaan dilo, hiti koniab.

Tumanud dau, pogului minampayat koiso nokorikot id Sulap Laban Rata, renjer nuluw pinoporuput do tongus tologod om kosoduo kopongintongan di osuriba id kawas ih kopongunsub do panganjur pigusaan pinoposiliu do sulap dilo sabaagi titik poingkakawas montok mampayat korikot pogului mindahu/lumintuhun kawagu.

Minoboros isio do ‘trek’ montok pigusaan toun diti nopo nga 26km katapi sabap do koyuon tawan au osonong, mampayat ngawi bulun noh kopomogonop do 20km noopo.

Malaysia minamalantoi bogian Kusai Elit montok pialaan toun diti maya Safrey Sumping, 33, ih nokoponurat timpu 2: 21.33s om Sandi Menchi Catlona Abahan, 26, mantad Filipina minamalantoi bogian Tondu Elit miampai pinonuratan timpu 2: 58.48s.

Timpu pialaan ko-29 pinopohompit do kiginumu 121 tulun dilo, pinaharo toun diti kalapas noidu di toun nakatalib sabaagi laang koumoligan sumusuhut kinantakan guminogor tana kitukuan 5.9 id skala Richter ontok 5 Jun.-Bernama