Adun Tanjung Batu kuminakap mikuo pinapatahak toluod barangan kogunoon tikid tadau kumaa munggui kinotutudan
TAWAU: Panakadai Montiri Kotundaan Kotos om Koburuon Teknologi Kopoilaan Datuk Hamisa Samat kuminakap munggui kinotutudan id Kampung Tanjung Batu Keramat, hiti koniab montok papatahak do toluod okitonan barangan kogunoon tikid tadau kuminaa paganakan munggui di nokohompit.
Id kinakapan dilo, isio ih nogi Puru Lamin Koundangan Pogun (Adun) Tanjung Batu mokianu paganakan munggui kinotutudan tuh alanut ginawo momusorou kinantakan taraat di nantakan.
Minoboros isio do toririmo porinta kikosianan kokomoi do kinantakan taraat di notoguang munggui om minggisom montok monulung diolo.
“Montok timpu diti, manahak tokou ponulungan okitonan barangan taakanon om kogunoon dapur montok diolo popolombus do kopoposion.
“Alansan kopio oku tuh alanut ginawo munggui kinotutudan tumoguang do pinoniisan diti,” ka dau kalapas minoi intong koyuon paganakan munggui kinotutudan dilo.
Namot dilo, duo mianak-anak nokito nowuwu id kinotutudan id iso lamin id Kampung Tanjung Batu Keramat, id jam 5.27 minsusuab songkoniab.
Munggui Buhari Langga, 57, om tanak tondu dau Nur Aisyah, 22, nokito nowuwu id tampat misusuai kikotumbayaan nouhung om apat kagu puru paganakan nokosiwat luminabus minanampasi tinan.
Montok koinsasanai, siam tinan lamin notutudan kopohompit do limo lamin kayu om apat lamin kagu 20 paratus notutudan id ponong tolig. Tapui naanu minomisok kiikira jam 6.34 kosuabon.
Id ahal dilo, Balai Bomba om Manampsi Tawau nokoponuhu kiginumu turu injin miampai 22 puru minoi id tampat kinantakan montok momisok kinotutudan. Nokoponulung nogi o tinimungan sakadai miagal Polis IPD Tawau om Koupisan Gugumaga Tulun Ginumuan Tawau.
Natadon kinantakan om anggaran ginumu kinorugian kakaal id ponoriukan.
Bogian Bomba om Manampasi Tawau mangatag kumaa komiti kampung tuh kaanu monuridong Tinimungan Bomba Komuniti id bogian diolo.