Tolu kagu ‘suspek’ pinoidu # Koporintaan pogun pinopogiwis karaja potunud om kumoduo potunud
KOTA KINABALU: Tolu kagu suspek ih tinahan di Tinan Monorina Pomunsaan Susuap Malaysai (SPRM) ontok 4 Oktober nakatalib, pinoidu mantad tahanan reman di Kuut Majistret Kota Kinabalu koniab.
Ponuhuan dilo pinalabus di Majistret Stephanie Sherron Abbie id suang linimput dau id jam 10 kosuabon.
Iti pinoposiliu do apat tulun koinsasanai pinoidu miampai kogos jamin.
Tolu ih pinoidu koniab nga kumoduo potunud koupisan pogun om tadik dau ih pinungaranan ‘Datuk’ dilo.
Kumoduo potunud tadik dau dilo pinoidu miampai jaminan SPRM kiginumu RM500 noribu aiso ‘deposit’ miampai duo tulun panjamin potitikid songulun om akauntan nopo pinoidu miampai jaminan RM50 noribu aiso ‘deposit’ miampai duo panjamin.
Kumoduo Boyoon Tinan Monorina ( Operasi) SPRM Datuk Azam Baki ontok romuto pinapatantu do kopoiduan kotolu-tolu suspek dilo om minoboros do pokionuon yolo montok poporuput tinan id Upis SPRM potitikid wulan.
Ka dau lohowon kawagu yolo montok monulung ponoriukan sokiro do kiguno ontok soira-ira timpu.
“Ponoriukan kakaal papanaon om gonopon idsuang timpu tosisikap pogului karatas ponoriukan patahakon doid Kumoduo Mangadawa tagayo montok laang potilombus,” ka dau.
Ontok 16 Oktober nakatalib, potunud koupisan dino nokomoi ih noriman mantad podi 4 Oktober nakatalib pinoidu miampai jaminan SPRM kiginumu RM500,000 aiso ‘deposit’ miampai duo tulun panjamin.
Namot dilo, Monunurat Koporintaan Pogun Tan Sri Sukarti Wakiman id iso kopoilaan minoboros do potunud om kumoduo potunud dilo pinogiwis garaja, pinogirotkuasa mantad podi 4 om 5 Oktober nakatalib.
“Goduo-duo diolo giniwis ontok tadau sompori- pori ginakom di tinan monguasa id tadau dino nokomoi.
“Goduo- duo diolo nogi au pabanaron sumuang do premis koupisan om nogi agensi suai ih kikoompitan miampai koupisan dilo,” ka dau.
Kawagu dau goduo-duo suspek nogi au pabanaron tumongkiad Sabah poompus timpu ponoriukan papanaon.
Ontok 5 Oktober nakatalib, Majistret Stephanie Sherron Abbie pinapabanar do panahanan reman solinaid turu tadau tumanud Seksyen 17 ( a) Akta Tinan Monorina Pomunsaan Susuap 2009, om ontok 10 Oktober nakatalib, Kuut Majistret pinopolombus do tahanan reman kumaa apat suspek tumanud Seksyen 17 (a) Akta SPRM 2009, om kopolombusan reman winonsoi tumanud Seksyen 117 Kanun Tatacara Jenayah solinaid sominggu.
Ontok pinanahanan suspek, nakaanu SPRM minamagahau tusin tunui kiginumu RM114 riong mantad lamin om upis potunud kaamung RM8.3 riong mato tusin songkosuaian om RM3.3 riong mantad turu pati popion bank.
Nokoilo nogi SPRM do kiginumu RM30 riong tusin ih pinawaliu do idsuang akaun labus pogun ino nopo nga RM29 riong nopo nga sanganu kumoduo potunud om lobi dino RM1 riong nopo nga sanganu potunud dilo.
Suai mantad pinamahauan tusin tunui, nakaanu nogi SPRM minamagahau 127 garan tana ih piaga-aga do kigatang kiikira RM30 riong om siam korita angapagon mogisusuai kawo Range Rover, Audi, BMW, Ford Ranger, Mercedez Benz, Mazda, Volvo, om Lexus mantad potunud om kumoduo dau, om duo pinamahauan kawawagu mantad bagas kumoduo potunud koupisan ih iso’i di tadau Kaapat nakatalib pinoposiliu do 11 korita ih nahau.
Kiikira 14.5 kilogram barang amas ih kigatang RM3.64 riong koinsasanai dino nogi nahau mantad goduo- duo lamin potunud om kumoduo potunud om id suang pati popion bank ih nokito ontok 6 Oktober nakatalib.