Klinik Kohidasan Tawau Kavo 2 nakaanu koponoimaan tavasi mogiigizon

TAWAU: Klinik Kohidasan Tawau Kavo 2 id Lahan Datuk Chong Thien Vun, doos Sin Onn doiti, ih tumimpuun do kotoinaan dosido koniab nakaanu koponoimaan di tavasi mantad mogiigizon songkoizonon.

Klinik dino ih suminovohi kotoinaan Koupisan Tuhun Sumakit Habus Hamin Pongusapan Tagazo Tawau om papanau kotoinaan mantad jam 8 kosuvabon gisom jam 5 sosodopon dino nogi poposodia do kotoinaan kaagaban.

Pinongintongan Bernama id tadau koiso klinik dino pinapanau kotoinaan, kogumuan tuhun sumakit ih sinoomo minoboos do nasantaban ginavo miampai kotoinaan klinik dino nokomoi om kipomusaavan do pinongukaban klinik dino nopo nga poinvavasi om kosudong.

Montok Mohoingon Kampung Tinagat, Osman Hassan, mimang no do klinik ih posodiaon do polinta dino kapanaak kounahan om kosivatan doid mogiigizon id posoihi uvang Tawau montok mokiubat om kotoinaan kohidasan di tavasi.

“Kikahansanan tokou do mogiigion kopomoguno do kounahan diti miampai tavaavasi, sundung pia kakaal kivaa piipio kokuangan miaga aiso sistom numbul giliran, nga koiho tokou om otumbazaan kokuangan dino uhanon sokukuudi,” ka disido doid Bernama doiti.

Osman ih nokoikot miampai savo dau doid klinik dino nokomoi minoboos do koposuazan Koupisan Tuhun Sumakit Habus mantad Hospital Tagazo Tawau dino nogi kaanu mongikit timpu tuhun sumakit om au minog magandad oindamaan ahaid montok mokiubat.

Namot dino, Potunud Kohidasan Sabah, Datuk Dr Christina Rundi minoboos do pinonuidongan Klinik Kohidasan Tawau Kavo 2 okitonan sabaagi tanda minggisom kozo o Koupisan Kohidasan Pogun poposodia do pongizonan kavavagu montok kotoinaan kohidasan.

Minoboos isido miampai kivao klinik vagu dino nogi, iho kaanu momogonop kavagatan kalaja posodia kivaa, om kahapas dino kaanu momohusi om poposigampot koponuu’an polinta montok ‘merakyatkan perkhidmatan awam’.

“Mogiigizon uvang Tawau koponoimo kotoinaan pongubatan di tavasi kozo id koozuvon ohumaag, asanang, suvai mantad kounahan posodiaon miampai tavavasi piagahon Koupisan Tuhun Sumakit Habus id Hospital Tawau,” ka disido id kopoihaan.

Minoboos Dr Christina do tuhun ngavi Tawau om uvang posoihi kavasa tumuubung numbul hotline 089- 775733 montok kapaganu do kopoihaan potihombus kikoompitan kapamanaan kalaja id Klinik Kohidasan Tawau Kavo 2. -Bernama