Atag pongogiwisan sikul sontoun montok mongundoronok oindamaan alaid - Lee Lam Thye
KUALA LUMPUR: Aparagat umampai nunu noopo ih kikompitan miampai tulun ngawi (aktivis sosial) Tan Sri Lee Lam Thye minoboros do atag popogiwis do koposikulan solinaid sontoun montok susumikul ih mongundoronok do susumikul suai nopo nga timpu alaid kopio om obuli kopohompit doid nunu noopo waya toiko tujuan.
Katapi idsuang ahal dilo mangatag isio timpu pongogiwisan lobi oniba do kiikira tolu wulan.
“Id timpu (pongogiwisan) sontoun diti onu ih antakan kumaa susumikul dilo? Isai ih mananggung mintamong diolo?
“Osorou ku ahal diti tantu koponusa do molohing om kapanahak do waya kumaa mogisusuai tinan suai kaamung agensi koporintaan om bogian monguasa,” ka dau kumaa Bernama.
Kinomi disio atag dilo ih binoros di Montiri Balajaran Datuk Seri Mahdzir Khalid di kawawagu ih minoboros do laang tokodou apatut ontokon sabaagi pangajaran kumaa susumikul di mongundoronok.
Mahdzir pinoruput minoboros do ahal mongundoronok ( membuli) maid- laid kopotongob om apatut rulanon tosisikap, om atag pongogiwisan sikul nopo nga laang tosonong kopio.
Lee kalapas dilo minoboros do ahal mongundoronok ( miagal moninduol) nokomoi susumikul okon ahal kawawagu om kopongogiwisan sikul solinaid sontoun di pinatag tumanud dau iso ralan panalasaian di osongkuro kiwaya/kiasil.
“Nung muhang tokou manalasai ahal ‘buli’ diti, pongogiwisan sikul okon iso panalasaian. Opurimanan ku lobi kiguno montok dotokou popogirot do rontob ‘ disiplin’ id sikulan ontok potitikid timpu,” ka dau.
Minoboros isio do susumikul ih aparagat momonosi laang mongundoronok (buli) mositi iloon mooi kaanu yolo papanau do ‘kaunseling’ poimbida.
Pinatarang di Lee do bogian kitonggungan mositi monoriuk kontodonon kobolingkangan ‘ buli’ id sikulan sabaagi laang montok manalasai do kobolingkangan di maid-laid kopotongob dilo.
“Nung muhang tokou momolingos do toiso-iso toruol (buli), mositi koilo tokou tanda-tanda (simpton) toiko kinontodonon dilo. Nung kinontodonon au tokou kaanu manalasai, ‘kes buli’ diti au tokou kaanu manalasai,” ka dau. -Bernama