Dadah: Duo susumikul kolej pialatan apat kusai kinoiyonon ih nagakom pulis
KUDAT: Duo susumikul kusai iso kolej hiti nopo nga pialatan apat kusai kinoiyonon ih ginakom pulis sabap kikotumbayaan nokohompit dadah id tolu kes misusuai hiti di tadau Kolimo nakatalib.
Boyoon Pulis Watas Superintendan Douglas Nyeging Taong minoboros do kaapat-apat kusai dino nokomoi sompori-pori mantad Kudat om Kota Belud.
Ka dau id suang kes koiso, pulis minamagakom songulun kusai kiumur 51 toun om minamagahau dadah kiwinagat 8.16 gram miampai gatang dagang RM1,200.
Tumanud dau ontok 14 Oktober nakatalib kiikira jam 9.30 dongotuong, pinoporuput ASP Juriaman Tiur minomuruan puru pulis mantad Koupisan Ponoriukan Jinayah Narkotik Longkod Upis Pulis Watas pinapaharo do pinonugkuan id iso lamin aiso numbur id iso kampung hiti.
“Suspek ih kiharo id liwang tombului lamin dilo kalapas pinonguhotan minonoriuk pinopokito do barang id siriba mija dapur. Songulun mantad pulis minaganu barang dilo om nokokito siam paket polositik kisuang kikotumbayaan dadah kawo syabu miampai winagat omumuk 8.16 gram.
“Pinoporuput kalapas dilo minogowit kawagu suspek om barang pinamahauan doid IPD Kudat montok laang potilombus,” ka dau.
Minoboros Douglas do suspek baino diti tinahan montok laang potilombus tumanud Seksyen 39A (1) Akta Dadah Koligogon 1952.
Id kes koduo, ka dau, pulis nakapamagakom songulun susumikul kolej om minamagahau dadah kiwinagat 0.30 gram miampai gatang RM50.
Ka dau ontok tadau iso’i kiikira jam 11 dongotuong, pinoporuput minomuruan puru Koupisan Ponoriukan Jinayah Narkotik (IPD) Kudat minamagakom suspek ih poingkakat id doumbangan iso lamin aiso numbur id iso kampung hiti.
Minoboros isio do asil pinomorisaan kumaa kantung sandangon sanganu suspek, nokokito pulis do iso straw warna opurak ih nosimbanan noh kisuang kakamot oniting kikotumbayaan dadah kawo syabu.
“Suspek kiumur 17 toun dilo tinahan om barang pinamahauan nowit doid IPD om soriukon tumanud Seksyen 12(2) Akta Dadah Koligogon 1952,” ka dau.
Id iso kes kagu, duo kusai kaamung songulun susumikul kolej kiharo dadah kawo ganja nagakom nogi ontok tadau diri id jam 11.10 dongotuong id iso lamin aiso numbur id iso kampung hiti.
Noboros di Douglas dopinoporuput songowian puru pulis mantad Koupisan Ponoriukan Jinayah Narkotik pinapaharo do pinonugkuan id iso lamin aiso numbur id iso kampung hiti om minamagakom goduo-duo suspek ih kiharo ganja ih linopot miampai polositik miampai kiwinagat 8.21 gram om piagaaga gatang dagang RM500 ih pinopi id suang beg tawak kiwarana oitom.
Goduo-duo suspek sompori-pori ih kiumur 18 om 21 toun om ‘positif’ pinoniisanwaig sobu baino tinahan montok soriukon tumanud Seksyen 6 Akta Dadah Koligogon 1952 om Seksyen 15(1)(a) akta ih iso’i.