Mogigion mokianu DUN Tulid patahakon kumaa PBRS
KENINGAU: Mogigion Mukim Tulid manahak sokodung poimponu nokomoi kinopohoroon watas Lamin Koundangan Pogun ( DUN) N. 44 Tulid.
Id suang timpu iso’i, pokionuon nogi diolo watas dilo lansanon di Parti Bersatu Rakyat Sabah (PBRS) montok popotilombus do kopongoputan kotundaan do hilo.
Boyoon Raan PBRS Kampung Sasagahan Maujus Bagan minoboros do parti pikoruhangan Barisan Nasional (BN) dilo otopot kopio om kopogowit do kotundaan montok rayat.
Ka dau tumimpuun mantad koiyonon pointalun/okurout kopio, baino Mukim Tulid nakaanu kotundaan om haro kounalan kiguno om ponogi pangalabus tagayo asil pomutanaman id watas labus kakadaian.
Miagal id watas suai, ka dau, Mukim Tulid natamangan noh do PBRS maya Porosiden dau Tan Sri Joseph Kurup mantad podi toun 1985 gisom baino, hinonggo mogisusuai kotundaan kiharo hiti.
“Karaja PBRS di kiasil kapasanang kopio dahai lobi-lobi kagu momuruan dagai asaru minsuang kampung. Mokianu yahai momuruan takawas BN tuh kapanahak do DUN wagu diti kumaa PBRS,” ka dau.
Noboros disio ahal dilo id Abaabayan Momuruan Songowian Rayat kopinamot Pamahagian Sakadai Wagas (magadau) om pinonimpuunan Raan PBRS Kampung Sasagahan. Abaabayan dilo pinotimpuun di Montiri id Koupisan Luguan Montiri ih nogi Puru Parlimen Pensiangan Tan Sri Joseph Kurup.
Minoboros ih Maujus do maya laang om kotorinaan tosonong PBRS, doulu noh ih Kurup ih nakapanahak kotorinaan tosonong kopio kumaa rayat gisom nakaanu yolo do kounalan kiguno id watas diti.
Kosokodung nogi ih Ketua Kampung Kawakahan Nelly Kundangau, Ketua Kampung Mototou Maichel Sambag om Ponorikohon Tinan Koburuon om Koumoligan Kampung (JKKK) Matol John Enam.
Namot dilo, kiginumu 143 foom kopuruan kawawagu kaampai mantad sinakagon tomulok ngawi pinatahak kuminaa Kurup id abaabayan dilo.