Jambatan gantung id Bali nopuhut, lobi 10 tulun noduso, 30 tulun nongosindualan
JAKARTA: Iso jambatan gantung ih nointutunan sabaagi Jambatan Kuning id Bali nopuhut sodop koniab om lobi 10 tulun kikotumbayaan noduso om 30 tulun pinatantu do noindamaan nosindualan.
Jambatan ih nosiliu iso mantad pamagayatan tutumombului dilo popiromut do Pulau Nusa Ceningan om Nusa Penida ino nopo nga pulou ngawi tongokoodo id posorili Bali.
Media ngawi id suang ahal dilo ruminomut Boyoon Longkod Kopoilaan, Informasi Badan Nasional Penanggulangan Bencana ( BNPB) Sutopo Purwo Nugroho sabaagi minoboros, jambatan gantung dilo noputut sabap nokolobi muatan sabap ogumu mogigion atangkangau tumalib sunsuyon ontok timpu dilo.
Ka dau, ontok kinantakan kiikira jam 7 dongosodop dilo, ogumu mogigion masaon papaharo do abaabayan ngawi kaagamaan id Pura Bakung Ceningan montok mamaramit Tadau Nyepi Segara om au yolo pinapanau do nunu noopo karaparatan daat.
Sunsuyon kininaru 150 meter miampai kalaabon 1.5 meter dilo kiharo id kolongkouon kiikira limo meter mantad kawaigan daat ih pinopotongkiad duo pulou dino nokomoi om ontok kinantakan, waig daat pinoruput do kuminodo.
Minoboros Sutopo do gisom baino diti, kiginumu siap tinan nokito noh om karaja mogium om manampasi sansagan tiningkodan id jam 8 dongotuong songkoniab sabap koyuon otuong om noputan kawagu id jam 6 kosuabon koniab.
Ka dau, kiginumu 34 munggui ih nongosindualan nowit noh doid Longkod Kolidasan Tinimungan Tulun songindoros.
“Tumanud do ruputan timpuuni, toinsanan nokorundun nopo nga tulun ngawi kinoiyonon, aiso tulun songkosuaian,” ka dau.
Watang kayu sunsuyon ih winonsoi ontok toun 1990- an dilo pogului diti pinoboros do haro naraag om mogigion kampung pinapataru do papan tanda kopoingatan kokomoi do kinaraagan dilo.
Songulun saksi minoboros do ontok kinantakan kiharo kiikira 100 tulun masaon tuminalib sunsuyon dilo om ino okitonan muyu-guyu pogului kabel kapatayidan dau noputut.
“Ogumu ih naratu id daat kaamung tangaanak om haro nogi ih nokosiwat luminoyog om natampasi,” ka dau. - Bernama