Warisan au kapangasou kagarasan UMNO, BN

KOTA KINABALU: Parti Warisan Sabah, ih pinonuridongan parti dilo nookunan do Koupisan Koporijistaran Kotinanan ( ROS) ontok 13 Oktober nakatalib, au kopio kapangasou kagarasan UMNO om Barisan Nasional ( BN) id Sabah.

Ponorikohon Gerakan Gamut Sakot UMNO Malaysia Datuk Zulkarnain Mahdar minoboros, kagu nga pinonuridongan parti wagu dilo ih binuruanan di Datuk Seri Mohd Shafie Apdal, okitonan sabaagi kolobian montok UMNO om BN id pogun diti.

“Parti ih nakasou miampai laang Shafie nopo nga PKR om DAP sabap soosomok toinsanan momuruan poingkakawas parti pambangkang dilo tuminongkiad do parti om tuminanud Shafie suai ko haro ih nogi ih minonuridong parti wagu,” ka dau id kopoilaan koniab.

Songkosodop, Mohd Shafie ih nogi bagas timbang porosiden UMNO pinopoboros do Parti Warisan Sabah sabaagi ngaran wagu parti dilo montok mogolon do ngaran Parti Kotundaan Warisan Sabah ih pinoturidong ontok 2013.

Kinasagaan ngaran om logo wagu parti dilo ih sinowoli dau ontok 22 September nakatalib, naanu mantad ROS.

Zulkarnain, ih nogi Ponorikohon NGO Pro BN, minoboros do Mohd Shafie okitonan kuminam sumiliu bontugan montok rayat Sabah nga nolihuwan disio o kinasalaan dau kumaa rayat Sabah ontok minongigit karaja Montiri Koburuon Labus Kakadaian om Wilayah.

Tandasan disio do au nakaanu ih Mohd Shafie minanaan tonggungan montok manalasai ahal kounalan ‘infrastruktur’ miagal ralan om kapanahakan lotirik montok rayat Sabah ontok poingigit karaja dilo.

“Mantad dilo, laang Mohd Shafie ih kaaka muhang mimboros montok rayat Sabah tototopot nopo nga ‘retorik’ noopo om muhang noopo mongidu do sumuli kumaa BN id Sabah,” ka dau.-Bernama