Alansan Upko poingkakaton id apat tirikohon DUN wagu
KOTA MARUDU: Alansan kopio ih Timbang Porosiden Pertubuhan Pasokmomogun Kadazandusun om Murut Bersatu ( Upko) Datuk Siringan Gubat ( tuh kopomuruanan longkod Barisan Nasional (BN) kapanahak kosiwatan kumaa parti dilo montok lumansan do pironitan dilo sokurang- kurang do apat mantad 13 tirikohon Lamin Koundangan Pogun (DUN) wagu ih pinaatag, ino nopo nga Dambai, Menggaris, Telupid dan Bengkoka.
“Montok dogo, alanan kopio oku do Upko kaanu sokurang- kurang do apat mantad 13 tirikohon DUN ih wagu ih pinaatag, hinonggo noilaan tokou watas ngawi haro ogumu pongundi diolo nopo nga Kadazandusun om Murut (KDM).
“Pogibabarasan dagai ahal diti miampai kopomuruanan poingkakawas BN maya Pemangku Porosiden Upko Datuk Seri Panglima Wilfred Madius Tangau,” ka dau.
Minoboros Siringan do kopokionuon tirikohon DUN wagu dilo nopo nga tumanud do pinonoriukan koinsasanai ih nowonsoi noh parti om ginumu kopuruan parti do hilo.
Otumbayaan nogi isio do parti dilo, iso’i miagal tambalut pikoruhangan suai, otorimo nogi haro kosiwatan nokomoi atag tirikohon ngawi DUN wagu dilo.
“Muhang tokou Upko popotilombus toinsanan tirikohon di ponokisaapan ontok pomilitan tagayo ko- 12 om ko- 13, om onuan sokurang-kurang do apat mantad 13 tirikohon DUN wagu ih pinaatag,” ka dau id pitimbungakan abar kalapas pinotimpuun do Konvensyen Upko Zon Kota Marudu, hiti di tadau Minggu.
Nokotindapou nogi ih Boyoon Bogian Upko Kota Marudu Padis Majingkin, Kumoduo dau Joseph Pulok, Monunurat Pulitik James Ingguru, Monunurat Tolosok Jaibie Dualis, Momuruan Kotundaan Rayat ( PPM) Paginatan Georgina George om Upisor Poimbida (Madius) Felix Saang.
Pogului id pason dau id ramai dilo, Siringan ih nogi Adun Paginatan om Montiri Kotundaan Kotos om Koburuon Teknologi Kopoilaan pinopoboros do sokodung poimponu kumaa Upko Bogian Kota Marudu ih muhang tirikohon DUN Menggaris toiko Tandek patahakon kumaa parti dilo montok tumanding id pomilian tagayo ginumuan (PRU) timpu rumikot.
Luminansan nogi isio di Madius montok ruminamit foom kopuruan mantad 573 tulun ih muhang sumuang Upko maya bogian dilo.
Kokomoi kinorikotan togumu puru Upko id ramai dilo, noboros dau do ino ponokotanda do parti dino id impoon di tototopot id padamaan diolo om montok popindaama do ‘hak’ Pasokmomogun.