Abaabayan mitatabang impoon tosonong popogirot pisompuruan montok mogigion songkoiyonon
RANAU: Abaabayan mitatabang okon noopo kaanu momongo do toiso-iso karaja miampai tosisikap, katapi kaanu nogi monorini balanja mantad kopomoguno kousinan suai ko kaanu popogirot do pisompuruan om piupakatan id pialatan mogigion songkoiyonon.
Irad dilo ih pokiuhangan di Koisaan Penaja Moniaga Tokoodo Watas Ranau ( 3PKDR) ontok minanganjur do pitabangan momilangga do tapak Longkod Transformasi Ekonomi Penjaja & Poniaga Tokoodo Mukim Paginatan Ranau, di kawawagu.
Pogitatabangan dilo pinopohompit do lobi 70 mogigion mantad limo kampung ih kaampai mantad Kampung Matupang, Terikon Tadsom, Sagindai Baru, Sagindai Lama om Bunakon.
Ponorikohon 3PKDR ih minomoyoon do pinitabangan dilo, Japraji Solikin minomisunud do pogitatabangan ih kumoinsan nogi pinaharo dilo kaanu popogirot do pisompuruan om piupakatan id pialatan mogigion miampai au mongiro tinonudon agama, koubasanan/kaadaton, suku tinaru om ‘ideologi’ pulitik.
“Suai ko ilo, ino nogi kopongunsub do tinimungan kusai om koonduan montok umampai id abaabayan kotundaan ekonomi penaja montok lobi koburu miampai lobi kalantoi kagu maya kosiwatan ngawi poniagaan di haro.
“Maya abaabayan irad diti, nakapaamung tokou do pomusarahan tosonong idsuang tinan tinaru kusai om tondu ngawi montok mongukab kaganaan ngawi poniagaan, popoburu karaja ngawi om manahak atag mooi katama tumoguang om monokialit miampai tulun suai di nokoburu noh, om nogi kaanu mogium kosiwatan poniagaan di obuli ampayaton,” ka dau.
Tumanud dau koposodiaan tapak poniagaan mositi palanon om bogian koisaan manahak do pingludaan, karaja tutuduk om sakadai kousinan.
“Pkimamaan nogi kotundunan puru om poposodia tokou palan kopongoligan insuran Skima kumaa puru koisaan nokorijisto,” kawagu dau.