Turu kusai nojiil om nadanda #Minamagakom sada minomoguno kakamot poobuson
KOTA KINABALU: Kuut Sesyen hiti koniab pinaparatu do ukuman jiil om danda kumaa turu kusai tulun songkosuaian sabap kasalaan kiharo om minamagakom mogisusuai kawo sada minomoguno do kakamot poobuson/poloputon.
Hakim Ainul Mohd Shahrin pinaparatu do ukuman dilo kuminaa di toinsanan natandasan, kalapas karatas panandasan binasa om minangakun kisala.
Suharto Pain, 48, Hasim Basilio, 27, Mohammad Utunain, 26, Mukramin Roslan, 26, Taib Kadir, 28, Danibol Jurahim, 35 sompori- pori nojiil sontoun om danda RM20,000 toiko jiilon 12 wulan.
Om Imran Roslan, 18, nadanda kiginumu RM20,000 toiko au nopo kabarai jiilon onom wulan.
Noilaan yolo minogowit om kiharo mogisusuai kawo sada kiwinagat 400kg, ih kikotumbayaan ginakom minomoguno do kakamot poloputon.
Kasalaan dilo pinapanau di ontok 10 Oktober toun diti id jam 11.30 dongotuong, id kawaigan Pulau Gaya, hiti.
Sabap kasalaan dilo, dinawa yolo tumanud Seksyen 26 ( 1) ( c) Akta Perikanan 1985 ( Akta 317) ih obuli ukumon tumanud Seksyen 25 ( b) akta iso’i, binasa songowian Seksyen 34 Kanun Koinggoritan.
Ukuman di pinoobi, obuli ontokon danda maksimum RM20,000 toiko kojiil gisom timpu duo toun, toiko goduo-duo dilo.
Tumanud kopoilaan akta, ontok tadau iso’i, upisor Agensi Popogirotkuasa Maritim Malaysia, minanahan iso bot monginsada id kawaigan Pulau Gaya, hiti.
Kalapas pinorisa, bot dino nokomoi noilaan minogowit om kiharo mogisusuai kawo sada ih kikotumbayaan ginakom minomoguno do kakamot poloputon.
Pangadawaan dilo pinapanau di Kumoduo Mangadawa Tagayo Nurul Hafizah Muhammad Iyed Atim.