Mohoing tondu noduso nalanggal ontok suminoboong lahan
KOTA KINABALU: Songuhun mohoing tondu noduso linanggal iso padsakazan ontok suminoboong talun alun id Lahan Pomotingan poindoos Kompleks Radio Televisyen Malaysia (RTM) doiti di kosuvabon koniab.
Munggui nointutunan sabaagi Augusta Lojikim, 76, tuhun kinoizonon mantad Kampung Kepayan Lahan Botung Penampang.
Huguan Pulis Uvang Kota Kinabalu Asisiten Komisioner M Chandra minoboos do kinantakan nantakan kiikila jam 6 kosuvabon songian munggui id pindahanan montok sumoboong lahan poguhui linanggal iso kulita Perodua Viva.
“Pinonoizukan timpuuni nokoiho do padsakazan ii pinapanau songuhun kusai kiumul 24 toun id pindahanan pougadan doid Manggatal mantad Kepayan.
“Songian nokoikot nopo id id tampat kinantakan, munggui noihaan tigog do suminoboong lahan mantad boogizan vanan lahan kinontodonon do papapanau suminikap mionguhok brek kulita montok momohiad mantad kalanggal munggui.
“Sabap do pivohitan kulita di osomok kozo ontok timpu kinantakan, munggui ingkuo po nga nalanggal kulita dino,” ka disido.
Minoboos Chandra do asil kinohigaganan natadon munggui pinatantu minidu pogun di tinimungan kaagaban ih nokoikot id tampat kinantakan.
“Munggui kahapas dino pinaatod doid Hospital Queen Elizabeth (HQE) montok haang potihombus,” ka disido mikuo minanamba do papapanau kulita aiso nunuunu kinosinduahan.
Ka disido, pinonoizukan potihombus noihaan do kohigaganan natadon do kinohovongon munggui ontok suminoboong lahan.
Tumanud disido, kes diti soizukon tumanud Seksyen 41 (1) Akta Padsakazan