Motac pinotimpuun Kimpin Modtohop ‘End In Sipadan’
KOTA KINABALU: Katanud miampai haang montok momungaan mahik Sabah sabaagi tiizonon podtohopan poinvavasi pomogunan, Komontilian Ponombuhuzan om Koubasanan ( Motac) minaganu haang miampai pinotimpuun do Kimpin Modtohop ‘End In Sipadan’ doiti koniab.
Potunud Upis Motac Sabah Ag Ahmad Zaki Abu Bakar id iso kopoihaan minoboos do haang dino nogi okitonan kapanakadai popogiot ‘imej’ Sipadan sabaagi tiizonon podtohopan kotopong pomogunan om sabaagi iso mantad ‘10 Tiizonon Podtohopan Poinvavasi Id Pomogunan’.
Ka disido, miampai kinampazatan media montok papalaku do kimpin diti, iho kapanakadai dati papalaku toi popointutun Sabah sabaagi tiizonon pihion modtotohop ngavi.
Iti piahatan haang komontilian montok mamagazat hobi ogumu modtotohop kinoizonon om songkosuvazan montok mongukab tiizonon podtohopan poinvavasi id Sabah.
Tumanud disido, modtotohop kamampu mongukab saavi-avi tiizonon podtohopan ih kivaa id pogun diti om koimpupuson pinghambaan id Sipadan, Semporna, id nombo iho pinihi sabaagi tiizonon poinvavasi id abaabazan diti.
Minanaak nogi jominan Ahmad Zaki do modtotohop poingamung dati id ‘pomogunan ii misusuvai’ id siibo daat ih kivaa id Sabah. Id ahal dino, kikosivatan nogi o modtotohop ngavi momiumon do kogingo’an kinoizonon sandad om pinghambaan di kagazat.
“Posodiaon kakamot gunoon diozu modtohop om ihumon halata id daat aahom ii opuavang id pogun diti miaga vatu kalang, penju om mogisusuvai ‘spesis marin’ id Kudat, Lahad Datu om nogi id Pulau Sipadan,” ka disido.
Kimpin diti katanud miampai kimpin ih pinoimagon id Pahang ih nointutunan sabaagi ‘ Start In Tioman’ id nombo iho kapanakadai papalaku do podtohopan posodia kivaa om boogzian kavavagu di pinointutun.