ONU DI KOZO KAHADANGAN DIOZU GOGO
AU zi Inah kalati diho kinouvangan dau do nokuo tu humodong nopo kozo dosido nga ingkaa no iti tuhun somoonu do opihadan ii mogovit do abaazatan dovokon tu au kogusa do onu ii maan om nogi au kabaga do pinuavangan om katama di do mimang do okon noopo ko mogkohundaat nga do kohombus nogi do mamatai.
Zi Inah nopo dau nga ohuduk om obinsianan, au zosido mimang do papalaat dovokon onu ii toguvangon dau nga tanak dau, monongodu om kalaja dau sondii sabap zosido nopo aiso do kalaja di pointantu tu okonko kisinikulan miaga diho tobpinai ngaavi dau nga pomusaavan dosido kotopong nogi di kisinikulan ngaavi maza no di navazaan ngaavi dau. Somoonu nogi do kohombus ii boos di au songkuo avasi do pamahavan dau diho kinouvangan dau.
Nababasan zou nodii do konggou do boos do tuhun do papalaat dogo miampai do boos do momitana dogo om kouot di zi Inah do kumaa diho tambahut ngaavi dau do ONU DI KOZO KAHADANGAN DIOZU DOGO tu au kou nopo tumood do moboos om papalaat do ngaan ku. Nung ondomon kozo au zou insan do papalaat dovokon, au zou insan do momitana dovokon nga ohoilan zou tu id doguvang ku avasi om oomis oh boos nga songian nopo do kotohikud zou om doiho no mogohimut om papalaat kou dogo ka di Inah. Aiso do simba diho kinouvangan dau om kivaa nogi di humodong om au nodii mintong dosido.
Iho au ii podulion di Inah nga songian nopo do kotoimo zi Inah do boos di kopoluo do ginavo dau om doiho nodii do koboos zosido di au avasi om iho opiumanan dau do iso douso dau nga somoonu do aanu dau do tumaan om sumambayang nopo nga songian nopo do au dau ataanan vaig mato dau tumuu humuzung doid pingas dau om muot nodii zosido do Tuhan do nokuo tu ingkaa oh nasip di avazaan ku kadau nga aiso ii do sisimba do aanu dau om potihombuson vagu dau iho sambayang dau. Somoonu do kopomusoou zosido do onu di ngaavi guno do mooi sambayang do tikid minggu do mintong nopo do kahasaan dovokon kadau nga aiso ii do songuhun do koiho diho sabap au ii dau pohombuson do kumaa suvai tuhun.
Nung moboos daa dosido iho tambahut dau om au zosido koiho toi konggou nga au ii dau podulion nga iho no do au ii mimang ii tuhan do onu ii poinhosok do sogigisom nga do insan tadau maan dau poimbuhazo.Nung kihasa oh tuhun di okuo podaa do mituubung tavavasi om salazon no ii au olotian ko iti pohombuson iho boos om kotongkop om isai di gia tamalu nga ii tinandasan.Iho nodo au daa avasi do ingkaa toondom di Inah nga kuozon di do kaanangan podi diho tambahut dau do kumaa dosido. Nung ondomon kozo om kuminam daa zi Inah do mogidu do mantad ngaavi diho kinouvangan dau nga momusoou vagu zosido do okonko ingkaa do monoguvang ahal miaga diho.
Tuminimpuun do mantad diho do au pinoduli dosido oh kaantakan miaga ngaavi diho om okonko tuminood iho kinouvangan dau do mogohundaat om mogohimut nga do ogumu nogi di toonggou di Inah do moboos dau nga somoonu do kohodong nogi isido diho boos ngaavi diho sabap do izou nga tuhun toomod nogi om apandai zou nogi do humodong kadosido do popoiho diho tambahut dau.Nga iho no pason diho tambahut dau do pohogoson ngaavi ino Inah aiso I guno do mokinongou kozo do boos dioho dino potihombuson nopo kalaja nu id daamin, koponompuuanan doid panambazangan tu nung ondomon kozo au ii kapamatai do koduduvo om sunduvan dotokou oh boos bo sambayangan nopo ngaavi oh tuhun dino mooi do insan tadau kopiuman daa ngaavi do koginavaan do Tuhan.
Boos ngaavi diho no ii ondomon di Inah songian do himuton do kinouvangan dau sabap zosido diti nga songuhun di au kotopong do sinikulan diho tambahut ngaavi dau om kalaja nga kalani no om mantad diho do au di songkuo zosido do umampazat ngaavi dioho.Somoonu nogi do aiso diho tambahut dau mooi ambahut dosido om iho nga kopogovit nogi do ginavo dau do lumuo om muot do nokuo tu ingkaa iho kinouvangan dau do mimang dau do miaga diho.Nga insan tadau di maapanau zosido do mooi indad do baas do pakaazan doid tutundoongon do baas tu aiso gia do kulita dau nokotigog zosido do nokokito diho songuhun tambahut dau doid tindahanon tu nakalanggal do puun do kazu om noindamaan di do nosinduahan om au di kopiuman om aiso ii vagu do kouvang dau. Miampai do au minomiubat do timpu onggozo nodau igitai iho tambahut dau om kakaal po do poimpasi om tulus do tinolifonan dau oh ambulon do mikot doid tampat diho. Au ii nakahahaid om koikot no ombulan om pulis doid tampat diho om ovito nodii dioho oh tinan diho tambahut dau doid Hamin pongusapan om mohoing diho tambahut dau nga nimaan ngaavi di Inah tolifonai.
Koikot nopo nodii doid Hamin pongusapan om tutulus do pinosuang oh tinan diho tambahut dau hinimput di Tabpo-abpo tu boos diho Dokutul nung nakalambat nopo do pipiio minit om au nodati aanu do manampasi zosido. Songian nopo nodii do nasalasai om pougadai nodii di Inah do mooi kalaja tu nakalambat nodii kozo zosido nga songian nopo do kosuang zosido doid upis dau, doiho no vagu do nokotigog zosido tu saviavi diho tambahut dau minudizo dosido do poingkuo no ii tambahut dioho ii Ani om nombo nodii. Simba no zi Inah do, aiso ii do ingkukuo bo diaha di nga kivaavaa nodo nosinduahan tu nakalanggal do puun kazu.
Siou boz ka dosido sabap nakalambat zou di baino nga simba no iho Boz dau do, au monguo bo Inah okonko sinaja nu gia, mantad baino saviavi zikoi mokiampun diau sabap di poguhu au zikoi poposongkuo diau Inah, siou nodiau kadiho Boz dau om tabi no dosido,om ingkaa nodii ngaavi ii suvai miampai do minokiampun dosido.Om simba no zi Inah do, au monguo bo nogi aiso ii kahadangan ku diozu bo. Izou diti aiso ii do sinikulan om okonko kivaa do ningkokoton miaga dovokon bo izou tuhun mosikin nga onu nopo ii nimaan diozu doid dogo nga aiso ii do popion ku doid ginavo izou nga mokiampun nogi ngaavi diozu kio, ka dosido om tobio no ngaavi dau iho tambahut dau.
Sominggu nodii kinotohibo om zi Ani nga navavasi nodii om kinouvangan dau nga ogumu di do minooi intong dosido doid Hamin Pongusapan nga zu Inah au podii nokougad tu ogumu oh kalaja do toodoon dosido nogi nakahansan nodii dau oh ginavo dau do ogumu ii oh tambahut do mooi intong dosido sabap zi Ani nokozo ii abaazatan om asasaau do papalaat dosido om ginavo di Inah nga mosiosi di do mooi tuubung di Ani miampai do omomoluan do pimbaasan vagu. Sasabap nodo nung okonko zi Inah nokokito dau doid tindahanon om aino no motuu daa doid pomogunan om ingkaa nokozo oh noondom di Ani do ontok di poinghuvi zosido doid katil dau doid Hamin Pongusapan.
Osuab ii ponolifon no zi Ani doid tampat do pakalajaan dioho do mogium di Inah om nokotigog no vagu oh ginavo dau do iumon di Ani.Nga songian nopo do kakakat dau iho tolifon om koonggou nodau zi Ani do moosboos do mokiampun kozo om monongkotohuod do kumaa di Inah do nung okonko iziau nga napatai zou no kadosido do miad-iad. Ani ada nodii ondomo ngaavi ino bo onu ii maan dotokou do baino nga do popotihombus tokou do koposizon dotokou nunu ii notohiban dotokou do mimang nga maan dotokou tondopo mooi do aiso no nahadtang miaga nokozo di mamaladu bo Ani kadosido do papasanang do ginavo di Ani. Iho no pason di Ani do, mikot no doiti do mintong dogo tu kiva do booson ku diau kavagu dosido. Di poinhuvi zi Ani koikot no songuhun Dokutul Tabaa do minomolisa dosido om poboos nodo, Ani kau kekurangan darah dan sekarang kami sedang berusaha mencari darah yang sama dengan darah kau, kami sudah puas mencari penderma yang sama dengan darah kau tetapi kami gagal. Poboos no Zi Ani do, doktor saya ada seorang lagi kawan yang akan datang hari ini saya harap darah saya dengan dia sama. Sasabap nodo okuangan kozo zi Ani do zaa au di zosido kaanu do moboos om koizazangai no.Natangkangau ngaavi iho Dokutul om ontok timpu do koikot no Zi Inah om poihoo no diho Dokutul do mindad kozo dau Zi Ani om sunudai nodii do onu ii naantakan do kumaa di Ani nung aiso nodo zaa do kosudong dosido.
Miampai do au minomiubat do timpu maai nodiho Dokutul polisao oh zaa di Inah do naamot di Inah do mintong diho voos diho Dokutul nung kosudong iho zaa dau om tulus minoboos iho Dokutul do, Syukur pada Tuhan Inah darah kau sama dengan darah Ani om zi Inah podii nga nounsikou tu kaanu do mamasi vagu di Ani do kumoinduvo nodii. Kasalasai nopo nodii do minaganu diho zaa di Inah om tulus do nimaan patambao diho Dokutul kuminaa di Ani om doiho nodii do nokito di Inah oh voos di Ani do minimang saang. Zi Inah nopo nodii om poindikau doid Dabping diho katil d hinuvizon di Ani gisom do nokoodop zosido.
Tigog poo m kivaa do tambahut dau do minomosik om intong ka di Inah om nohiputan dotuhun kinouvangan ngaavi dau kalaja.Do naamot diho koikot no iho Dokutul Tabaa do pinopoiho dioho kaampai no iho mohoing di Ani do, ‘Kita bersyukur pada tuhan pada masa ini sebab kita sudah mendapat penderma darah untuk Ani.’ Saviavi nounsikou do nokonnggou do ingkaa iho boos diho Dokutul om uoto nodii dioho do isai ii minonuhung om pobooso nodii diho Dokutul nga minintong po haid di Inah sabap minoboos haid zi Inah do ada poihoo izioho do izou ii minanaak do zaa kahaid di Inah nga iho boos diho au ii apatut do maan hisoko kadiho Dokutul om maai nodii dau pointahango. Sekarang kita berterima kasih pada Inah sebab darah dia saja yang menyelematkan nyawa Ani. Saviavi dioho ii nokotindapou do nokopomusoou do ula haid dioho do mimang di Inah nga zi Inah au ii humodong dioho nga pinopokito do koginavaan nga somoonu do kouot nogi zosido do ONU DI KOZO KAHADANGAN DIOZU DOGO kadau. Om do baino nunu nopo ii nakatahib hiniivan dau do montok di Ani id nombo do pinopokito zosido do koginavaan kumaa diho kinouvangan ngaavi dau.
Songian nopo nodii do nokopiuman zi Ani om tulus do minogium di Inah om zi Inah poindikau doid doos dau minigit do hongon di Ani miampai do minoboos do, Ani doiti zou doos nu, om tulus do igitai dau oh hongon di Inah om poboos nodo, Inah mokiampun zou diau om monongkotohuod zou kozo diau tu nu g okonko iziau napatai zou nodaa di kotohuadan om ompuno no ngaavi ii hasa ku kio.
Ani kadi Inah do otoodo ii do minoboos aiso ii do hasa nu nung kivaa po nga ahaid kuno kaampun, nohiivan ku no ngaavi ii Ani ka dosido om gopuso nodau zi Ani om mantad di diho do miaga nopo nodii iizioho do miobpinai om kaampai no iho tambahut ngaavi dioho doid pakalajaan dioho. Pason di Inah kuminaa dioho do ingkaa no tokou do poimpasi doid pomogunan bo kivaa ngaavi do kahasaan sabap do kikomungkaangan ga ngaavi tokou nga maza nodo kohudukan do ginavo do kaanu tokou do mogiaampun dokumaa tiso om tiso kadosido om kovunduk no zosido doid dumbangan di Ani.
Gizak no zi Ani do minomohoou do Dokutul om notimungan zi Inah om songian nopo do nopolisa zosido do Dokutul om noihaan zosido do kitoluo doid tutok dau ii au nodii miho do ubaton tu toluo dau diho nakahaid no.Tiad di Ani au miho do tumingkod sabap au podii naavi oh booson dau om ingkaa no kinoikoto nga kuozon songkuo po do miad nga au nodii miho tunggagon zi Inah onu ii maan nga do sumambayang montok dosido.
Ingkaa no oh koposizon doid pomogunan nung nokopiuman tokou do nakahasa om pokiampun no sabap kapatazon nopo do tososonguhun nga au ii oihaan do songian do hoovon do Tuhan onu ii maan dotokou nga mogiaaampun do kumaa di nosinduahan.Mononso podii zi Ani miampai diho kinouvangan dau nga au nodii miho poguhion onu ii maan dioho nga naampun kuno ngaavi iziozu kadi Inah di poguhui do minomupus do boos dau di touvi no.- Pomohiis noopo kio.