Koumoligan pinogirot: Musa # Kopogirotankuasa koinsanai kooturan pinotilombus
KOTA KINABALU: Kopongogirotan koumoligan om kopogirotan kuasa koinsanai kooturan potilombuson di toinsanan agensi koumoligan tumanud do koposudongan.
Minoboros ih Boyoon Montiri Sabah Datuk Seri Panglima Musa Haji Aman do ilo nopo nga momodimpot iman-imanon koingkokoton ekonomi om popoingkawas do kolumaagan koposion rayat.
Isio ih nogi Ponorikohon Komiti Karaja Koumoligan Pogun ( JKKN) Sabah minoboros do kopongintongan tototopot nowonsoi noh kokomoi kapamanaan laang ngawi kopongogirotan koumoligan, doulu noh id bogian Esszone tuminanud do kinotontuan Miting JKKN ontok 6 April 2016.
“Nosoriuk noh do komiti o koinsanai atag, ruputan, kobolingkangan om waya ngawi asil kinapamanaan laang ngawi kopongogirotan koumoligan katanud miampai walu laang kopongogirotan koumoligan maya do miting dilo.
“Nakapaganu noh laang o JKKN Sabah poposodia do Koturan Atatap Operasi (PTO) kaparagatan ngawi ‘transhipment’, kapamanaan om ponorinaan kaparagatan kopogirotankuasa mantad agensi- agensi koumoligan di kotopong miampai gaab popoingkawas do ekonomi om popoingkawas do kolumaagan koposion rayat,” ka dau id iso kopoilaan kalapas miting JKKN Sabah hiti, koniab.
Minoboros ih Musa do komiti kikosianan kopio om mokinongou pomuhabaan ginawo rayat kokomoi kobolingkangan ekonomi di notoguang di mongindapu ngawi, kaamung noh monginsada om okudian kapanahakan sada ih pinopoingkawas do balanja koposion rayat montok koinsasanai.
Idsuang ahal dilo, ka dau, JKKN Sabah maganu laang sondiri om papatantu do toinsanan kaparagatan pamadagangan ilo nopo nga ‘transhipment’, import eksport barangan maya Ponuhuan No 2 pogului diti maan pabanaro toiko ukabon kawagu tumimpuun 1 Februari 2017.
“Kopongukaban kawagu diti minog do sumuku kumaa PTO Pongumbasian Kaparagatan ‘Transhipment’ ih pinalabus do JKKN Sabah. Pangapalaian montok popoburu do ‘ transhipment’ minog do posuulon kumaa Tinan Koumoligan Pogun Sabah montok koposomoan,” ka dau.
Minoboros isio do CIQS Kudat papanau kotorinaan tumimpuun 1 Februari tabantalan montok ralan Kudat pakaayan id Palawan, Filipina kotopong miampai SOP Pengoperasian CIQS Kudat ih nopongo noh om minog do tonudon di toinsanan agensi om bogian suai di nokohompit.
Namot dilo, minoboros ih Musa do kapamanaan kopongiduan bot pam id Sabah maan potilombuso miampai ‘status quo’, ino nopo nga pomogunaan om kapasanganuan bom pam ih pabanaron noopo kumaa tulun mamasok ih kiharo kad kointutunan totopot noopo.
Ka dau kapasanganuan om kopomogunaan bot pam di okon tulun mamasok pogonuan laang tokodou miampai potilombus di agensi koumoligan miampai manahan, mamagahau om momunso.
Minoboros isio do toinsanan kaparagatan ‘ import eksport’ asil daat Indonesia ih pinoburu di monginsada toiko pironitan koisaan monginsada id Tawau ukabon kawagu miampai ‘status quo’.
“Poingkuro poh nga, kopotindalan asil ngawi daat diti minog do poburuon id jeti toiko tampat ponindalan di totopot. Koupisan Ponginsadaan Pogun Sabah popisamo do ahal diti,” ka dau.
Kokomoi ponguyungan modidikot aiso kasagaan (PTI) maya Lolokiton Sandakan pakaayan id Zamboanga Filipina, noboros di Musa do karaja om laang pasanangon katanud miampai kapatantuan Komiti Induk Ponorinaan Rayat Songkosuaian Pogun Sabah montok manalasai do koliudan PTI.
Idsuang ahal dilo, ka dau, kapamanaan kaparagatan ponguyungan PTI maya Lolokiton Sandakan pakaayan id Zamboanga Filipina maan papanao miampai ‘status quo’ miagal ih do kapamanaan karaja pogului ponuhuan kopogirotan koumoligan kitimpu 6 Jun 2016 pinalabus.
Kawagu dau, ponguyungan PTI miampai saragagayaan miampai momoguno do aset Susumangod Daat Diraja Malaysia (TLDM) kotopong miampai kinookunan pialatan Luguan Montiri om Porosiden Filipina nogi papanaon ontok kolimpupuson Februari 2017.
“Otumbayaan o JKKN sabah do koputusan diti kopoingkawas do kolumaagan koposion rayat miampai poposotol do kopontingan koumoligan om id timpu ih iso’i, monulung koingkokoton ekonomi songkoiyonon tumanud do koyuon ‘menang-menang’.
“Ino nogi kotopong miampai gaab porinta montok papatantu do kosunion ekonomi di kotilombus montok kolumaagan rayat om tatap popogulu do kopontingan montok manamong koumoligan rayat om pogun Sabah montok koinsasanai,” ka dau.