Maritim Malaysia minonulung tina monontian tanak miapid pokiubatan id lamin pongusapan
KUDAT: Agensi Popogirotkuasa Maritim Malaysia (Maritim Malaysia) pinotimpuun do ponulungan kaagaban pinapawaliu songulun sumakit tondu di agayaan monontian mantad Klinik Kolidasan Karakit pakaayan id Hospital Kudat.
Potunud Maritim Watas Sabah om Labuan Laksamana Pertama Maritim Mohd Zubil Mat Som minoboros do kopowolihan sumakit dilo ontok diri nopo nga montok kapaganu do pongubatan sumusuhut osikap id Hospital Tondu om Tangaanak (HWKK) Likas.
“Linimput Operasi Maritim 16 Kudat nokotorimo pamalahauan kaagaban mantad dokutur pakaraja id Klinik Kolidasan Karakit, Pulau Banggi pinoposunud do songulun mantad sumakit diolo momoguno do kopowolihan tosikap.
“Sumakit kiumur 32 toun ontok dilo monontian tanak miapid kiumur walu wulan nakakandai toruol akawas raha om waig sobu ayamut.
“Pinosunud nogi di dokutur pakaraja do sumakit dilo momoguno do pongubatan tosikap dokutur tabaal mantad HWKK Likas sumusuhut koyuon sumakit di asangadan doti toruol monigowo om obuli mogowit kapataion nung au ubatan tosisikap,” ka disio id iso kopoilaan hiti koniab.
Minoboros isio do suminikap o bogian diolo mionuhu Bot Mintamong 44 minoi id tampat kinantakan montok manahak ponulungan sumusuhut bot posodia haro sanganu klinik dilo naraag.
“Soira nokorikot id Jeti Karakit id jam 6.05 sosodopon, nakaanu sumakit dino pinopoundaliu doid bot om nokorikot id Jeti Marina, hiti kiikira jam 8.10 dongotuong.
“Sumakit kalapas dilo pinawaliu doid van ambulans om pinaatod doid Hospital Watas Kudat montok pokiubatan potilombus,” ka disio.
Minoboros Mohd Zubil do Maritim Malaysia toririmo posodia manahak do ponulungan kumaa tulun ngawi di momoguno do ponulungan ontok antakan o kaagaban toiko kaantakan taraat.