Lahad Datu nokoponurat 11 kes denggi
LAHAD DATU: Panel Mononontuduk Klinik Kolidasan Sabah nokoilo tolu koiyonon di aparagat kes toruol rumoliu denggi hiti, di kotimpuunon toun diti.
Ponorikohon dau, Stanley Chin Yat Min minoboros do tolu koiyonon dilo nopo nga Taman Aman 1, Kampung Tabanak om Taman Warisan ih nokoponurat 11 kes id kotolu-tolu koiyonon dilo mantad podi kotimpuunon toun diti.
“Taman Aman Satu nokoponurat limo kes, sinusuhut miampai apat kes id Taman Warisan om duo kes kagu pinoruput id Kampung Tabanak.
“Koinsanai kes kopohompit do tulun sumakit kiumur bindurugan onom gisom 24 toun,” ka disio id iso pinirubaan songowian Upisor Kolidasan Lahad Datu, Dr Dr Valentine Japule Gantul hiti, koniab.
Minoboros ih Chin do koponoluod doid kontodonon pomogontoluan togonok Aedes id koiyonon dilo kaamung noh ahal koyuon tawan, tampat pataaman sampa om kinoinggumuan projik kotundaan id bogian posorili koiyonon dilo.
“Timpu rumasam nogi poposikap kagu koindalan pomogontoluan togonok sabap tanak togonok diti lobi asanang sumiliu togonok osukod,” ka dau.
Poingkuro poh nga, ka dau Koupisan Kolidasan watas aparagat om minggisom papaharo pongintongan id premis om bogian tiyonon montok manamong pomogontoluan togonok id posorili Lahad Datu.
Pokionuon nogi disio tuh tulun ngawi hiti maganu timpu solinaid 10 minit montok momorisi do koiyonon id posorili koiyonon montok mangantob karalad pomogontoluan togonok Aedes.
Id ahal dilo, minoboros ih Chin do mongindapu tapak pamansaian id watas diti nogi pinosorou mooi mintamong kabarakasan om papatantu do aiso ouhung waig di kapasanang montok pomogontoluan aedes id bogian pamansaian sompori-pori.
Namot dilo, minoboros isio do poompus 2016, Lahad Datu nokoporikud kinoingkawasan kes saasak (denaggi) ilo nopo nga 195 kes piagalon 99 kes id toun pogului dilo.
“Ruputan dilo nogi pinoposiliu do Lahad Datu sabaagi watas kolimo poingkakawas kes saasak denggi id Sabah di toun nakatalib,” ka dau.