ADUN Sungai Air Tawar minidu pogun

SABAK BERNAM: Puu Hamin Koundangan Pogun (ADUN) Sungai Air Tawar, Kamarol Zaki Abdul Malik, 58, minidu pogun id kinoizonon dau doiti koniab.

Papapanau dau, Mohd Sufaat Salimin minoboos do kinapatazon Kamarol Zaki noihaan kiikila jam 8 kosuvabon koniab ontok disido mugad maganu tiagak montok tumindapou iso abaabazan id boogizan Hamin Koundangan Pogun (DUN) dino nokomoi koniab.

Tumanud Mohd Sufaat, nokoiho tiagak au humabus mantad tizonon dau, sansagan disido minaganu haang minamabak tongobon om nokokito Kamarol Zaki poinhatan au kopiuman tinan id hivang tombuhui hamin tiagak.

Tiagak nopo nga Kumoduvo Huguan Umno Boogizan Sabak Bernam om Huguan UMNO Laan Sungai Air Tawar.

Huguan Pulis Uvang Sabak Bernam, Supt Nor Azmi Isa ontok tinuubung pinapatantu do kinapatazon Kamarol Zaki, nga au kaanu manaak kopoihaan potihombus ontok timpu diti.

Ontok pomihian tagazo ginumuan nakatahib, Kamarol Zaki ih huminansan Barisan Nasional ( BN) minangaha calon PAS, Wahid Rais miampai majoriti 1,416 undi.

Namot dino, Poniikon Tinan Pituubungan UMNO Selangor, Tan Sri Noh Omar minoboos do UMNO Selangor natagakan songuhun buu’an di ogumu minonohuod kalaja kumaa layat.

Noh mamason koihadan kumaa saavi-avi puu paganakan om kopomuu’anan UMNO Sabah Bernam sabap kinougadan Tiagak.

Monunuat PAS Selangor, Mohd Khairuddin Othman nopo nga minoboos do Tiagak nointutunan sabaagi songuhun di osuau om tomoimo apaagat id pitubatan pitimbungakan DUN ontok poimpasi isido.