Duo kusai kinoiyonon nagakom, 149.0 gram dadah nahau id ‘Ops Tapis Dadah’
BELURAN: Pulis minamagakom duo kusai kinoiyonon om minamagahau 149.0 gram dadah kikotumbayaan kawo syabu id bogian kadai id Kampung Long-long, Batu 8 Wonod Telupid, kiikira jam 5.45 sosodopon tadau Koiso nakatalib.
Luguan Pulis Watas (KPD) Beluran Supt Shivananthan A/L R Velauthan minoboros do duo kusai dilo kiumur 27 om 44 toun, sompori-pori kialamat id Lahad Datu om Ranau.
Ka disio, sontimungan puru Bogian Ponoriukan Jinayah Narkotik (BSJN) Longkod Upis Pulis Watas (IPD) Beluran pinapanau do ‘Ops Tapis Dadah’ id poingompus Ralan Telupid-Ranau om TelupidBeluran.
Tumanud dau, pulis minanahan duo kusai di okitonan masaon poingkakat id bogian oliwang poingoros barisan kadai id Kampung Long-Long Batu 8 id koyuon mosi-rosi.
“Kalapas puru tokou mininsomok om pinopointutun do tinan sabaagi pulis, goduo-duo kusai dilo nokotigog om minogidu daa nga naanu minamagakom,” ka dau id iso kopoilaan hiti koniab.
Ka dau ontok pinomorisaan kumaa kusai kiumur 27 toun dilo ih nogi aiso karaja, nokokito pulis do iso linopotan plastik kiwarna aragang idsuang paket kiziip id kantung sandangon di pinakai dau.
“Soira nukaban linopotan plastik aragang dilo id toguang goduo-duo kusai dilo om puru ih suai, nokokito tolu paket plastik sompori-pori potitikid iso kisuang dadah kawo syabu,” ka dau.
Minoboros ih Shivananthan do dadah dilo kiwinagat piaga-aga do 149.0 gram om piaga-aga kigatang RM13,500.
Goduo-duo suspek nowit doid IPD Beluran montok laang potilombus. Maya pinoniisan waig sobu (urin) di pinapanau nokoilo do suspek ‘positif’ dadah kawo syabu (methaphetamine).
Kes soriukon tumanud Seksyen 39B Akta Dadah Koligogon ( ADB) 1952 ih kopogowit ukuman giwison mandatori nung katantu kasalaan. gram bernilai RM13,500 yang dirampas.