Sugut momoguno kopio kotorinaan bomba: James
PAITAN: Kotorinaan bomba om manampasi toiko sokurang-kurang do tinimungan bomba sukarela kiguno kopio turidongon id Sugut montok momogonop kogunoon mogigion doulu noh montok manalasai do kaantakan kotutudan.
Puru Lamin Koundangan Pogun (ADUN) Sugut Datuk James Ratib minoboros do kotorinaan dilo pokigunoon kopio miampai tosisikap kalapas maganu kokiraan kinantakan kinotutudan di nantakan di kawawagu, ih pinoporundun do niawa songulun mogigion.
Tumanud disio ahal aiso balai bomba om mongumolig toiko sokurang-kurang do tinimungan bomba sukarela id watas dilo okitonan do kopoinggorit do papanau karaja momisok tapui kinotutudan miampai tosisikap, om nogi koponoluod doid kopunsoan lobi ogumu harata kakamot suai ko kopohompit do koligaganan niawa.
“Sugut momoguno do iso balai bomba om mongumolig toiko sokurangkurang do tinimungan bomba sukarela sondiri sabap do kotorinaan diti kiharo id Pitas toiko Kinabatangan noopo.
“Piwolitan di osodu okitonan kontodonon do tinimungan bomba om mongumolig odomut korikot id tampat kinantakan. Om koyuon diti kontodonon do osikap tapui rumalad om nogi kopogowit ogumu kopunsaan.
“Mokianu oku sakadai mantad Koupisan Bomba om Mongumolig Malaysia (JBPM) Pogun Sabah montok ahal diti montok kowosian tokou songowian,” ka disio kumaa monunurat abar kalapas minoi kakap puru paganakan id Kampung Kubambangan, Paitan di nokohompit id kinantakan kinotutudan koniab.
Ontok tadau Minggu nakatalib, songulun kusai kiumur 31 toun nowuwu suai ko iso linominon miampai tolu baris kadai om pongidopan nopunso id kinotutudan di nantakan id jam 7.42 dongotuong.
Ontok kinakapan dilo, minanahak ih James do toluod kiginumu RM12,000 kuminaa paganakan munggui montok monulung papagaan do kawagatan diolo sabap nokotoguang do kinantakan taraat dilo.
Luguan Umno Bogian Beluran dilo nogi kikosianan miampai kinantakan dilo om mamason koihadan kumaa paganakan di nokohompit.
Nokotindapou nogi id kinakapan dilo nga Luguan Watas Sugut Paitan Awang Bangis Teraweh, Momuruan Kotundaan Rayat Sugut Jalil Atang om sawo Adun Sugut, Datin Hajah Noriah Pg Ahmad.