Soriukon porinta miampai tosorisid
# Kapanahakan pampasan kumaa paganakan munggui notorob id kawaigan Pulau Mengalum
KOTA KINABALU: Soriukon do porinta miampai tosorisid kokomoi kapanahakan korugian (pampasan) kumaa munggui bot notorob ih kopohompit do tutumombului China id kawaigan Pulau Mengalum di ontok 28 Januari nakatalib.
Montiri Ponombuluian Koubasanan om Kinoiyonon Posorili Datuk Masidi Manjun minoboros do mogisusuai ahal apatut do intongan tototopot kaamung noh mongintong laang pogun labus manalasai do koyuon irad dilo.
“Nung kiguno onuan do pampasan, tantu noh do komponi tutumombului di nokohompit id kinantakan diti ih apatut kopio manalasaia ahal dilo.
“Nga, porinta nogi nga iso’i kohompit om ontok timpu iso’i, intongan tokou koinsanai ahal montok monulung munggui di nokohompit kaamung noh atag manahak do pampasan ih pinoboros di Konsul Jeneral China Chen Peijie di kawawagu,” ka dau.
Noboros dau ahal dilo ontok rinomu id abaabayan kopongukaban upis wagu Borneo Holiday Sdn Bhd om pangaramitan kinouliton toun ko-10, hiti koniab.
Kokomoi ahal kapal notorob id Teluk Usukan ih pinoboros do maan punsoo, noboros di Masidi, bogian dau nogi kakaal magandad kopointarangan mantad wakil ponoriukan mantad Universiti Malaysia Sabah (UMS) ontok Februari diti kokomoi do kes dilo.
Ka dau, okon ko isio noh ih muhang kapaganu do kapatantuan kikoompitan ahal dilo, katapi, ogumu tulun ginumuan kaamung rayat pogun suai muhang nogi mokiilo do ahal di tototopot.
“Otootopot mokiilo oku poingkuro ponoriukan UMS diti kapaganu do kasagaan montok momunso do kapal notorob ih okito kiguno kopio montok pomorunan ponombuluian id Sabah.
“Ahal diti kopongorosi kopio om momoguno kopio tokou do kopointalangan di tototopot kokomoi ahal irad diti,” ka dau.
Pogului, kokomoi do abaabayan dilo nopo nga, alansan kopio ih Masidi tuh agensi ponombuluian dilo kamampu sumiliu komponi ponombuluian id Sabah ih osiliu pamagayatan tagayo tutumombului sokiro ko toririmo kiharo koulalahon tosonong om kaandad miampai au momusorou do kountungan noopo.
Nokotindapou nogi id abaabayn dilo nga Monijor Tagayo Borneo Holiday Sdn Bhd Faye Robert.