Songulun mororobuat nokokito tinan tanak poinsawit id pukot
TAWAU: Songulun mororobuat nokokito iso tinan tanak ih nakasawit id pukot dau id kawaigan Sg Manurung, Sebatik, Indonesia, id jam 11.36 kosuabon koniab.
Luguan Pulis Watas Tawau ACP Fadil Marsus minoboros do tinan dilo nointutunan sabaagi Nur Ainun, kiumur sontoun onom wulan om pinatantu sondiri di molohing tanak dilo.
Miampai kinokitonan dilo, ginumu munggui ih nokito natambaan kumaa 14 tulun kopohompit do 10 tinan om apat natampasi, om songulun kagu munggui kakaal natagak.
“Molohing tanak dilo nopo nga pasangan misaasawo ih pogului diti tinampasi id kawaigan Batu Payung, sangadau kalapas kinanatakan bot notorob nantakan,” ka dau.
Ka dau kinapatantuan tinan dilo winonsoi di Budiman Muslimin om Hasmida Masniaga ih kakaal pokiubatan id Hospital Tawau maya gambar tinan dilo nokito.
Minoboros ih Fadil do noilaan di Budiman om Hasmida o tinan dilo sabaagi tanak diolo tumanud do pakaian tohuri noh ih pinakai di tanak dilo pogului kinantakan dilo nantakan.
“Kopoilaan kokomoi do kinokitonan munggui ko-14 kinantakan bot tosiau notorob diti naanu tokou mantad upisor piturubungan Konsulat Republik Indonesia (KRI) Tawau,” ka dau.
Minoboros isio do tinan dilo nokito di Samad Talpi, 45, ih nogi songulun mororobuat id Sg Manurung, Kecamatan Sebatik Kalimantan Utara (Kaltara) Indonesia.
Minongomi potilombus, pinatantu nogi di Fadil do tinan tanak dilo nowit noh di bogian monguasa Indonesia doid Hospital Nunukan montok laang potilombus.
“Baino songulun poh munggui ih kakaal ihumon ilo nopo nga ih Joko Rahman, 35, pakaraja kabun id Lahad Datu, om natadon mantad Indonesia,” ka dau.