Nokopinsin mongingia noduso, savo nosinduahan id kohigaganan
TAWAU: Songuhun nokopinsin mongingia noduso kahapas nokoompit id kohigaganan id simpang Tutubpoon Kapal Tumuhud Tawau Batu 18 Lahan Apas, doiti, kiikila jam 9.15 kosuvabon tadau Koonom nakatahib.
Huguan Pulis Uvang Tawau ACP Fadil Marsus minoboos do munggui ih noduso nointutunan sabaagi Ismail Osman, 68, kialamat id Kg Jaya Baru, Batu 6, Lahan Tengah Nipah, Lahad Datu.
“Savo munggui, Karnih Sukarti, 57, ih nogi songuhun mongingia om pinapanau do padsakazan poguhui kinantakan noindamaan nosinduahan, notipu tuhang tikagang gibang om nosinduahan id topos.
“Pinosuvang nogi savo munggui doid Wad Pamahapakan Tondu Hospital Tagazo Tawau montok pokiubatan potihombus,” ka disido.
Minobooszi Fadil do padsakazan ih sinakazon misaasavo dino nokopilanggal miampai kulita 4WD ih sinakazon di duvo miobpinai ih au nakakandai kinosinduahan.
Ka disido, papapanau kulita 4WD dino nointutunan sabaagi Andryanto Salimin, 46, om susumakai dau Hermanto Salimin, 45.
“Maza pinonoizukan timpuuni nokoiho do kinohigaganan nantakan ontok padsakazan sinakzon misaasavo dino ontok id pindahanan mantad Kakadazan Tawau pougadan doid tutubpoon kapal tumuhud.
“Koikot id tampat kinantakan, padsakazan dioho suminuvang simpang nga linanggal di iso kulita 4WD mantad boogizan Balung pougadan doid kakadazan,” ka disido.
Tumanud dau, Ismail ih pinaatod doid Hospital Tawau pinatantu do minidu pogun kiikila jam 2 sosodopon ontok tadau kinantakan, id wad kaagaban hamin pongusapan.
Ponoizukan kes papanaon di Upisol Monoizuk Insp Mohd Riduan Abdullah @Mustaffa tumanud Seksyen 41 (1) Akta Padsakazan Lahan 1987.