APMM pinapatantu duo tinan nokito di tadau Kolimo nakatalib munggui bot notorob

KOTA KINABALU: Agensi Popogirotkuasa Maritim Malaysia (APMM) pinapatantu do duo tinan nokito do tinimungan mogium om manampasi (SAR) di tadau Kolimo nakatalib nopo nga bot notorob id kawaigan Batu Payung, Tawau.

Potunud Maritim Wilayah Sabah om Labuan Laksamana Pertama Maritim Mohd Zubil Mat Som minoboros do tinan koiso songulun kusai nointutunan sabaagi Amiruddin Beddure om ih koduo songulun tangaanak tondu nointutunan sabaagi Nur Hafizah Amiruddin, 2.

“Goduo-duo munggui nopo nga rayat Indonesia. Tinan diolo naanu noh di paganakan om tinan pinolisok id Tana Pangalabangan Silam Tawau,” ka dau id kopoilaan hiti koniab.

Id tadau Kolimo nakatalib, tinimungan SAR nokokito duo tinan dilo id kawaigan Kinabutan, Tawau om kawaigan Selatan Tinagat kipiwolitanan Indonesia mantad Unit Sawat Maritim pialatan 3.50 sosodopon om jam 4 sosodopon.

Gisom baino diti, 13 mantad 15 munggui kinantakan dilo nokito noh miampai apat natampasi om siam kagu minidu pogun.

Minoboros ih Mohd Zubil do papanau karaja SAR bot notorob id kawaigan Batu Payung, Tawau ih sumuang tadau Kolimo pinotilombus montok mogium duo kagu munggui rayat Indonesia ih kakaal natagak.

Id kinantakan tadau Koduo nakatalib, bot tosiau ih minogowit 15 rayat Indonesia kaamung juragan, notorob kikotumbayaan do binobog umbak tagayo kiikira jam limo gisom 10 minit kalapas minamanau mantad jeti Tinagat Batu Payung id jam 5.30 sosodopon ontok id pindalanan pakaayan id Sungai Nyamuk, Indonesia.

Kokomoi papanau karaja SAR bot tutumombului notorob id kawaigan Pulau Mengalum, noboros di Mohd Zubil do papanau karaja sumuang tadau ko-16 dilo noputan miampai kalaabon sektor pomogiuman kopohompit 300 batu nautika persegi kopohompit do siam ‘aset’.

Papanau karaja SAR montok mogium om manampasi limo kagu munggui natagak dilo kakaal kopohompit do kawaigan Sabah, Miri, Sarawak om Brunei, ka dau.

“Gisom kosuabon koniab, aiso nunuunu ponokotanda di nokito nga karaja mogium om manampasi kakaal pinotilombus gisom kapaganu ponuhuan potilombus mantad bogian sawat,” ka dau.

Id kinantakan 28 Januari nakatalib, bot tutumombului kawo katamaran minogowit 28 tutumombului rayat China om tolu tanak akapal, notorob kikotumbayaan sabap ologod tongus om agayo umbak ontok id pindalanan pakaayan id Pulau Mengalum.

Gisom baino 26 munggui nokito noh kaamung apat ih noduso. -Bernama